Certifikimi i rezultatit të zgjedhjeve të 23 qershorit mbetet një pikëpyetje për misionin vëzhgues të ODIHR-it, i cili do të hartojë raportin përfundimtar të procesit.

Shefja e misionit, Koni Mekormak, i tha Vizion Plusit se KQZ-ja mbetet një problem shqetësues. "Unë mendoj se duhet të ketë përmirësime dhe ne do të nxjerrim rekomandime për këtë çështje,' thotë Mekormak.

Por duke u ndalur tek momenti aktual, certifikimi i rezultatit është ende i paqartë sesi do të ecë para, shton ajo.

Vëzhguesit e huaj nënvizojnë se procesi i numërimit të votave mund të ishte shumë më i shpejtë dhe transparent. Zonja Mekormak thotë se ndër rekomandimet që do t'u ofrohen palëve, është edhe rishikimi i Kodit Zgjedhor në këtë aspekt.

"Ka disa rrugë për të përshpejtuar procesin, i cili ishte transparent deri diku, por grupet e numërimit të votave e ndërprenë punën pa ndonjë arsye të fortë dhe kjo duhet riparë edhe në Kod".

Raporti përfundimtar i zgjedhjeve do të publikohet 8 javë pas mbajtjes së zgjedhjeve. (Leftion Peristeri)