Aleanca për Shqipërinë Europiane e udhëhequr nga kreu i PS-së, Edi Rama do të përfaqësohet në legjislaturën e ardhshme me 85 deputetë, ndërsa Aleanca për Punësim, Mirëqenie dhe Integrim e kryeministrit aktual Sali Berisha do të ketë vetëm 55 deputetë.

Këto janë rezultatet paraprake, teksa në të gjitha Komisionet Zgjedhore zonale në Shqipëri vazhdon numërimi i votave. 

Në bazë të rezultateve të pjesshme fitues duket koalicioni i majtë i drejtuar nga Partia Socialiste. Është Shkodra që duhet të ketë prodhuar rezultatin surprizë, duke përmbysur raportin në 6 me 5 për të majtën, një rezultat që çon për herë të parë atë në avantazh në këtë qark.

Procesi i numërimit vazhdon edhe në Tiranë, edhe pse me ritme më të ngadalta, ku sërish rezultati është dukshëm në favor të koalicionit të majtë.

Pjesëmarrja në zgjedhjet e së dielës ishte 53,75 % e personave me të drejtë vote. (Top Channel)