Plot 15 kompani prestigjioze ndërkombëtare nga Gjermania, Austria, Italia, Kina, Kuvajti, Turqia, Emiratet e Bashkuara Arabe, por edhe nga Shqipëria, kanë shprehur interes për të ndërtuar bulevardin e ri të Tiranës. Bashkia e Tiranës do të procedojë me vlerësimin e dokumenteve të paraqitura, procedurë e cila do të përfundojë brenda 10 ditëve. Ky institucion ka në dispozicion fondin prej 61 milionë eurosh për zbatimin e projektit të studios arkitekturore "Grimshaw Architects" për zgjatimin e bulevardit dhe rehabilitimin e lumit të Tiranës.

Punimet e zbatimit të këtij projekti do të financohen nga marrëveshja e financimit ndërmjet qeverisë së Shqipërisë dhe Fondit të Zhvillimit të Abu Dhabit, firmosur më datë 21 prill 2013, me vlerë 54 milionë euro, si dhe grantit nga qeveria e Katarit me vlerë 7 milionë euro. Në fazën e parë të punimeve, që nis nga Stacioni i Trenit, përfshihet edhe një parkim i madh nëntokësor. Përgjatë bulevardit është parashikuar kalimi i linjës së tramit, që do të lidhë terminalin multimodal të pasagjerëve me sheshin "Nënë Tereza".

Nga http://www.panorama.com.al/