Kancelarja gjermane Angela Merkel priti të dielën në Berlin me një ceremoni ushtarake homologun e vet kinez Li Keqiang. Lidhur me vizitën e kryeministrit Li, gazeta gjermane "Die Welt" komentoi në një artikull në uebsajtin e vet se "Gjermania do të vazhdojë të jetë partnerja më e rëndësishme e Kinës në BE dhe Kina do të përkrahë edhe në të ardhmen procesin e integrimit europian dhe një euro të fortë".

Duke iu referuar fjalëve të kryeministrit kinez Li Keqiang, në artikull thuhet se qëndrueshmëria e euros është në të mirë jo vetëm të Europës, por edhe të Kinës e të mbarë botës. "Kina e konsideron euron si një monedhë të rëndësishme botërore dhe mban një rezervë të madhe valutore në euro", thuhet në artikull.

Për sa i përket rolit të Kinës në përballimin e krizës europiane të borxheve, "Die Welt" vlerëson se ajo ka dhënë ndihmën e nevojshme gjatë tërë procesit, gjë që pasqyron vëmendjen që i kushton pala kineze zhvillimit të marrëdhënieve afatgjata me Europën.

(Çan Jean/Artani)