Presidenti Xi Jinping i kërkoi qeverive vendore në provincën jugperëndimore kineze, Sichuan, të goditur nga një tërmet i fuqishëm muajin e kaluar, që të përqëndrojnë punën e tyre në rindërtimin e zonave të shkatërruara.

Gjatë një vizite në Lushan, që u prek më rëndë nga tërmeti, Xi kërkoi nga qeveritë lokale që të vlerësojnë urgjentisht dëmet materiale dhe të hartojnë plane për rindërtimin e zonave të shkatërruara.

Sipas kreut të shtetit, autoritetet, gjatë hartimit të planeve duhet të fokusohen te investimet, taksat, përdorimi i tokës, punësimi dhe garantimi i sigurimeve shoqërore.

Një tërmet me magnitudë shtatë ballë sipas shkallës Rihter goditi Lushanin në 20 prill, duke shkaktuar vdekjen e 196 personave. (Ardi Pulaj)