Media shtetërore siriane u shpreh të mërkurën se kryengritësit në provincën veriperëndimore të Idlibit kanë vrarë një numër njerëzish me anë të një lëngu të panjohur.

"Avujt e nxjerrë nga bidonat me lëndë të lëngshme, të ruajtura nga një bari në shtëpinë e tij në qytezën Saraqeb në pjesën rurale të Idlibit, vranë mysafirin e tij dhe atë vetë, teksa një prej fëmijëve të shtëpisë hapi njërin prej këtyre bidonave," bëri të ditur agjencia shtetërore e lajmeve SANA.

Në një njoftim të vet të mëparshëm, SANA është shprehur se persona të armatosur hodhën "një pluhur të panjohur" në fytyrën e një numri njerëzish në Idlib. Sipas SANA-s, viktimat shfaqën shenja mbytjeje, të dridhura dhe simptoma të tjera në rrugët e frymëmarrjes dhe "terroristët" i çuan ata në spitalet turke, me qëllim akuzimin e forcave siriane se kanë përdorur armë kimike.

Qeveria e Sirisë dhe kryengritësit e armatosur kanë shkëmbyer akuza mbi përdorimin e armëve kimike gjatë konfliktit të përgjakshëm në këtë vend. (Artani)