Punët e shpëtimit pas tërmetit prej shtatë ballësh që ra të shtunën në Lushan të provincës Sichuan të Kinës Jugperëndimore, kanë hyrë në ditën e tyre të pestë. Ndonëse ka kaluar periudha prej 72 orësh, që vlerësohet si "koha e artë për punët e shpëtimit", kërkimi për të mbijetuar ende vijon.

Komanda ushtarake e kryeqendrës së Sichuanit Chengdu bëri të ditur se ekipet e dërguara në zonat e prekura nga fatkeqësia kanë zhvilluar punët e shpëtimit nga ajri. Në qytezën Lushan është krijuar një stacion tranzit për helikopterët, për të shpërndarë ushqime, tenda, jorganë dhe sende të tjera të nevojshme për jetesën, për të ndihmuar në punët e shpëtimit në zonat e thella ku mungojnë rrugët.

Sipas uebsajtit të Administratës së Tërmeteve të Kinës, deri në pasditen e së mërkurës tërmeti në Lushan ka shkaktuar 196 të vdekur dhe 11 470 të plagosur, ndërsa 21 veta janë ende të humbur. Ndërkohë, deri në orën 14 të po kësaj dite u regjistruan gjithsej 4135 pastërmete. (Wang Xianya/Artani)