Ministria e Jashtme siriane i kërkoi të martën Francës të ndalojë ndërhyrjen në punët e brendshme të Sirisë, pas dyshimeve të shprehura nga Parisi lidhur me amnistinë e përgjithshme të shpallur nga presidenti sirian Bashar al-Asad.Megjithatë, Franca u shpreh e shqetësuar se amnistia "mund të jetë një manovër për të fituar kohë."

Asadi shpalli po të martën ​​një amnisti të përgjithshme për krimet e kryera përpara kësaj dite. Kryeministri sirian Wael el-Halqi tha se 7 mijë të burgosur do të lirohen me këtë amnisti.

Ministria e Jashtme siriane bëri të ditur se amnistia u bë në prag të përvjetorit të tërheqjes së trupave franceze nga Siria në vitin 1946, që shënoi fundin e mandatit të Francës në këtë vend.

"Populli ynë nuk do ta lejojë Francën që të kthehet në Siri përmes mbështetjes së grupeve të armatosura terroriste dhe komplotit të tyre për të derdhur edhe më shumë gjak siranësh," u shpreh kjo ministri në një deklaratë. (Artani)