Pasditen e së hënës u mbyll në provincën Hainan të Kinës Jugore takimi vjetor i Forumit Aziatik të Boaos. Gjatë tre ditëve të organizimit të këtij forumi, liderë, sipërmarrës dhe studiues e ekspertë nga vende të ndryshme zhvilluan diskutime rreth temës "Ristrukturim, përgjegjësi dhe bashkëpunim: Azia synon zhvillimin e përbashkët". Si një hap i rëndësishëm i hedhur nga qeveria e re kineze në fushën diplomatike, forumi ka tërhequr vëmendje të madhe ndërkombëtare.

Në forumin e sivjetshëm u organizuan 54 veprimtari dhe gjëja që ra më shumë në sy, ishte zgjerimi i gjeografisë së pjesëmarrjes. Të pranishmit në këtë forum, që nuk vinin më vetëm nga Azia, por nga të pesë kontinentet e botës, diskutuan mbi problemet e diplomacisë publike, të marrëdhënieve e strategjisë ndërkombëtare, sigurisë rajonale etj. Në forum u trajtuan për herë të parë temat për Afrikën, Amerikën Latine dhe Europën. Në diskutimet për këto tema morën pjesë edhe presidentët e Zambias, Finlandës, Perusë dhe Meksikës, të cilët shkëmbyen mendime me pjesëmarrësit e tjerë lidhur me ripërtëritjen e kontinentit afrikan, transformimin e Amerikës Latine, rikthimin e aftësisë konkurruese të Europës etj.

Në krahasim me vitet e kaluara, këtë herë Forumi i Boaos spikati për vënien e theksit në dialogun dhe shkëmbimet. Në të morën pjesë jo vetëm politikanë, por edhe sipërmarrës të suksesshëm dhe ekspertë të qarqeve të ndryshme.

Në fjalimin e mbajtur në ceremoninë e hapjes së forumit, kryetari i ri i shtetit i Kinës Xi Jinping u shpreh se "Forumi i Boaos po gjendet në një pikënisje të re. Shpresojmë që ai do të ketë zhvillim të mëtejshëm". Pas përfundimit të Forumit të Boaos, disa media ndërkombëtare komentuan se, 12 vjet pas krijimit të tij, vihet re rritja e peshës dhe ndryshimi i rolit të këtij forumi. Sipas këtyre mediave, "forumi ka filluar nga Kina, trajton kryesisht çështjet aziatike dhe po u kushton rëndësi problemeve globale, duke u shndërruar dalëngadalë në Davosin aziatik".

　　(Çan Jean/Artani)