Rregullatori i komunikimit në Korenë e Jugut u shpreh se sulmi kibernetik i së mërkurës mbi bankat dhe transmetuesit në këtë vend mund të mos ketë ardhur nga Kina siç u besua fillimisht.

Piratët e internetit shkatërruan rrjetet e tre transmetuesve dhe dy bankave, gjë që u mendua si vepër e ushtrisë së madhe të "luftëtarëve kibernetikë" të Koresë së Veriut.

Zyrtarët në Seul thanë në fillim që kishin zbuluar se sulmi ishte kryer nga një server në Kinë. Por Komisioni i Komunikimit i Koresë së Jugut u shpreh më pas se një hetim më i kujdesshëm i sulmit në njërën nga bankat, tregoi se adresa e IP-së ishte virtuale dhe përdorej brenda bankës për qëllime të brendshme. Kjo adresë përkonte rastësisht me një adresë të regjistruar në Kinë.

Rreth 32 mijë kompjutera u goditën nga sulmi kibernetik i së mërkurës dhe mund të nevojiten deri në pesë ditë që ata të rikthehen plotësisht në punë. (Artani)