Zëdhënësja e Ministrisë së Jashtme të Kinës Hua Chunying iu përgjigj pyetjeve të gazetarëve lidhur me ceremoninë përkujtimore për tërmetin dhe cunamin e 11 marsit në Japoni.

Znj. Hua u shpreh se, pas tërmetit të 11 marsit 2011 dhe cunamit të mëpasshëm që goditi Japoninë, qeveria dhe populli kinez i shprehën popullit japonez ngushëllimet dhe mbështetjen e tyre, e po ashtu Tajvani i Kinës i ofroi popullit japonez ndihmë. Në ceremoninë përkujtimore të zhvilluar sivjet, pala japoneze i vendosi personalitetet nga Tajvani së bashku me stafin e misioneve diplomatike dhe të institucioneve ndërkombëtare, duke shkelur parimet përkatëse të "Deklaratës së përbashkët kino-japoneze" dhe premtimet e Tokios lidhur me problemin e Tajvanit. Kina i ka shprehur palës japoneze kundërshtimin e saj të vendosur dhe pakënaqësinë e madhe, si edhe proteston ashpër ndaj një veprimi të tillë.

"Dua të theksoj edhe një herë se pala kineze kundërshton me vendosmëri çdo vend dhe çfarëdo forme që përpiqet të krijojë dy Kina, ose një Kinë e një Tajvan. Një përpjekje e tillë është plotësisht e pamundur. Ne e nxitim palën japoneze të ndreqë gabimin dhe të mbajë premtimet," u shpreh zëdhënësja e diplomacisë kineze Hua Chunying. (Vera/Artani)