Qeveria japoneze bëri të ditur mbrëmjen e së martës se më 30 janar një fregatë luftarake kineze ka përdorur një radar shënjimi ndaj një anijeje të Forcës Detare Vetëmbrojtëse të Japonisë, e cila ishte duke lundruar në ujërat e ishujve Diaoyu.
Lidhur me këtë, kryeministri japonez Shinzo Abe tha të mërkurën paradite në sesionin plenar të dhomës së lartë të parlamentit japonez se ky është një veprim i njëanshëm provokues që rrezikon të shkaktojë një situatë të paparashikuar. Duke shprehur keqardhjen e thellë për këtë incident, ai theksoi: "Dëshiroj që Kina të tregojë një qëndrim të vetëpërmbajtur, duke u kthyer në rrugën e marrëdhënieve strategjike japonezo-kineze me përfitim të ndërsjellë, për të shmangur përshkallëzimin e situatës."
Sipas medias japoneze, radari i përdorur këtë herë nga fregata kineze ndryshon nga radarët e zakonshëm që thjesht shfrytëzohen për të ndjekur itinerarin e aeroplanëve ose vendndodhjen e anijeve në det. I ashtuquajturi "radar i shënjimit" siguron informacion për një sistem të drejtimit të qitjes me qëllim goditjen e objektivit. Prandaj, media japoneze e cilësoi këtë si një ngjarje jashtëzakonisht serioze.
(Çan Jean/Artani)