Forcat siriane të opozitës kanë rënë dakord për krijimin e një qeverie kalimtare. Koalicioni Kombëtar Sirian i Opozitës dhe Forcave Revolucionare është mbledhur për herë të parë në Kajro që prej krijimit, duke bërë të ditur se qeveria kalimtare do të ngarkohet me detyrën e komunikimit me bashkësinë ndërkombëtare në emër të popullit sirian.

Khaled Saleh, anëtar i koalicionit opozitar sirian, tha se ky koalicion kishte bërë përpjekje për të bashkuar radhët e veta dhe për të rënë në një mendje për krijimin e qeverisë kalimtare:

"Ne kemi tani një mekanizëm të qartë për formimin e qeverisë kalimtare. Ne kemi punuar edhe për të bashkuar të gjitha njësitë e ndryshme që luftojnë në terren në Siri, që ka qenë një kërkesë e bashkësisë ndërkombëtare dhe që ne dëshironim shumë ta arrinim. Gjithashtu ne kemi ngritur një komision ligjor që do të jetë përgjegjës për hetimin e kriminelëve dhe të krimeve kundër njerëzimit që po ndodhin në Siri. "

Saleh bëri të ditur se qeveria kalimtare do të ketë deri në 10 ministra. Ata duhet të jenë mbi 35 vjeç, teknokratë dhe të vijnë nga jashtë koalicionit. (Artani)