Kopja origjinale e librit të parë shqip, "Meshari i Gjon Buzukut" mbërriti nga Vatikani në Tiranë.

Ekspozimi i librit që daton që nga viti 1555, bëhet me rastin e 100 vjetorit të shpalljes së Pavarësisë, ndërsa do të qëndrojë në Bibliotekën Kombëtare gjatë muajit nëntor.

Biblioteka Apostolike e Vatikanit pranoi kërkesën e Shqipërisë për të ekspozuar veprën më të lashtë në gjuhën shqipe, "Mesharin", në Tiranë.

Që nga botimi e deri me 1740, gati dy shekuj, "Meshari" ishte një vepër e humbur, një vepër e panjohur. Më 1740 në Bibliotekën e Propaganda Fides, afër Romës, Mesharin e don Gjon Buzukut (1555) e zbuloi ipeshkvi i Shkupit Imzot Gjon Nikollë Kazazi nga Gjakova.

Libri mendohet të jetë shtypur në Venedik me alfabetin latin, duke shtuar disa shenja cirilike për tingujt në shqip. Ky zbulim bëri bujë të madhe, sepse është libri i parë në gjuhën shqipe.

Ky zbulim mbeti në heshtje për më tepër se një shekull, deri më 1909, kur e rizbuloi arbëreshi Pal Skiroi, në Bibliotekën e Vatikanit, ku gjendet edhe sot me shënimin Katalogu: R.G. Liturgia III, 194, raporton gazeta "Tema". (Ardi Pulaj)