Ministri i Jashtëm iranian Ali Akbar Salehi mohoi të jetë arritur ndonjë marrëveshje mes Iranit dhe Shteteve të Bashkuara për mbajtjen e negociatave kokë më kokë për programin bërthamor,

Komentet e tij zoti Salehi i bëri pasi gazeta New York Times botoi lajmin, duke cituar zyrtarë të administratës Obama: "Ne nuk jemi përgjegjës për asgjë të botuar. Ne nuk kemi asnjë lloj negociate me Shtetet e Bashkuara. Ne nuk kemi asgjë për momentin në këtë drejtim, por ne kemi negociuar brenda kornizës P5 +1, ku Amerika gjithashtu është e pranishme."

Më herët Shtëpia e Bardhë e mohoi lajmin.

Nga ana tjetër, kryeministri izraelit Benjamin Netanyahu tha se nuk ishte në dijeni të ndonjë kontakti..

"Unë besoj se mënyra më e mirë për të zgjidhur në mënyrë paqësore çështjen e programit bërthamor të Iranit është me anë të sanksioneve edhe më të ashpra dhe një alternativë të besueshme ushtarake. Për sa kohë që unë jam kryeministri i Izraelit, Izraeli nuk do t'i mundësojë Iranit arritjen e aftësisë për të prodhuar armë bërthamore." tha Netanyahu.

Irani ndërkohë vazhdon të insistojë për natyrën paqësore të programit të bërthamor, ndërsa Uashingtoni dhe aleatët e tij perëndimorë e shikojnë programin e Iranit si një mbulesë për prodhimin e armëve bërthamore. (Leftion Peristeri)