Ministrat e Jashtëm të vendeve të BE-së, gjatë takimit në Luksenburg, vendosën sanksione shtesë ndaj Iranit, si presion që vendi të heqë dorë nga programi bërthamor.

Sanksionet përfshijnë ndaljen e importimit të gazit natyror nga Irani si dhe masa të tjera në sistemin bankar, transportin detar e sektorë të tjerë të industrisë.

Shefja e politikës së Jashtme dhe sigurisë së BE-së, Kethrin Eshton shpreson që sanksionet të ndikojnë në pozicionin e Teheranit në bisedimet e pritshme.

"Ne jemi të vendosur për një zgjidhje diplomatike dhe shpresojmë se Irani do të angazhohet seriozisht përpara propozimeve tona. Por sot ne vendosëm shtimin e sanksioneve", tha Eshton.

Ministrat e jashtëm të vendeve anëtare të BE-së diskutuan mes të tjerash edhe për situatën në Siri dhe për dërgimin e mundshëm të një misioni ushtarak trajnimi në pjesën veriore të Malit, në Afrikën Perëndimore. (Ardi Pulaj)