Qeveria siriane ka rënë dakord për një marrëveshje, që lejon UNICEF të zgjerojë misionin humanitar në mbarë vendin, duke rritur praninë në vendin e shkatërruar nga lufta.

Drejtori i UNICEF Anthony Lake u shpreh se kjo marrëveshje lejon Agjencinë e Kombeve të Bashkuara për të depërtuar përtej veprimtarive në Damask, me qëllim që t'u vijë në ndihmë edhe sirianëve në zonat e tjera të konfliktit.

Kjo do të përshpejtojë zbatimin e planeve për vaksinimin e 1 milion fëmijëve, të cilët mund të rrezikohen nga prekja e sëmundjeve të rrezikshme si fruthi etj.

"Ne kemi një plan, për shembull, të vaksinojmë mbi një milion fëmijë në muajt e ardhshëm, kështu që bashkëpunimi me pothuajse 40 organizata të shoqërisë civile vendase dhe Shoqatën e Kryqit të Kuq, kemi shumë mundësira për shpëtimin dhe përmirësimin e qindra apo mijëra jetëve atje."

Ka mbi 1 milion sirianë të shpërngulur, gjysma e të cilëve janë gra dhe fëmijë.

Shumë prej tyre janë detyruar të strehohen nëpër shkolla, xhami dhe ndërtesa të tjera publike. (Albana)