Presidenti sirian u shfaq për herë të parë në publik, që pas shpërthimit në Damask që u shkaktoi vdekjen katër zyrtarëve të lartë. Ai vizitoi një xhami me rastin e Bajramit, që shënon fundin e muajit të shenjtë të Ramazanit.

Ndërkohë, anëtarët e misionit vëzhgues të OKB-së bënë përgatitjet e fundit për t'u larguar nga Siria, pas përfundimit të mandatit. Kryetari i misionit Babacar Gaye komunikoi me gazetarët përpara largimit.

"Është një gjë e mirë që OKB-ja do të qëndrojë në Siri, pavarësisht se kush po ikën dhe kush do të qëndrojë, pasi është e rëndësishme që të ndalet dhuna dhe që OKB-ja të jetë e përfshirë në dialogun mes palëve", tha Babacar Gaye.

Një zyrë e re ndërlidhjeje e OKB-së është hapur në Damask për të mbështetur përpjekjet e ardhshme për paqen. (Ardi Pulaj)