Në mbarë Kinën janë zhvilluar protesta pas njoftimeve të medieve japoneze se dhjetë aktivistë kanë zbarkuar në ishullin Diaoyu.

Njerëzit dolën në rrugët e Guangzhout, Shenzhenit, Shenyangut, Hangzhout, Harbinit dhe Qingdaos, në mëngjesin e së dielës, duke protestuar kundër zbarkimit të aktivistëve japonezë në ishullin Diaoyu.

Në Guangzhou, rreth 100 protestues u mblodhën përpara Konsullatës së Përgjithshme të Japonisë. Protestuesit valëvitën flamurin kinez dhe mbanin në duar pankarta ku shkruhej: "Mbrojmë sovranitetin e Kinës mbi ishujt Diaoyu".

Gjithashtu protestuesit bërtisnin: "Japoni, largohu nga ishulli Diaoyu!"

Në Shenzhen, protestuesit ishin rreth 1000. Ata marshuan në rrugët kryesore të qytetit.

Në të gjitha qytetet kineze protestat e së dielës në mëngjes kanë qenë të qeta dhe paqësore. Ndërkohë policia ka ndjekur nga afër zhvillimin e tyre. (Leftion Peristeri)