Kina, nëpërmjet ministrit të jashtëm Yang Jiechi, nxiti qeverinë dhe opozitën siriane të rifillojnë sa më parë dialogun.

Yang takoi në Pekin të dërguarën e posaçme të presidentit të Sirisë, Bouthaina Shaaban.

Ministri gjithashtu e nxiti qeverinë siriane të zbatojë rezolutën e Këshillit të Sigurimit të OKB-së, planin me gjashtë pika të Kofi Ananit si dhe deklaratën e miratuar në mbledhjen e ministrave të Grupit të Aksionit mbi problemin e Sirisë.

"Qeveria siriane duhet të marrë edhe masa konkrete për të plotësuar kërkesat e arsyeshme të qytetarëve për reforma, në mbrojtjen e interesave të tyre", tha Yang Jiechi.

E dërguara e posaçme e Bashar al-Asadit, Bouthaina Shaaban tha se qeveria siriane është në favor të ndërmjetësimit ndërkombëtar, që do të ndihmojë në ndaljen e dhunës. Ajo u shpreh e gatshme për nisjen e dialogut me opozitën dhe përfaqësuesit e shoqërisë civile për të rikthyer stabilitetin në Siri. (Çan Jean/ Ardi Pulaj)