Organizata e Bashkëpunimit Islamik ka pezulluar nga gjiri i vet Sirinë. Vendimi u mor pas një takimi të veçantë të këtij blloku 57-anëtarësh në Mekë të Arabisë Saudite.

Ministri i Punëve të Jashtme i Arabisë Saudite Nizar Madani Bin Obaid thotë:

"Ka pasur shqetësim të madh lidhur me mizoritë dhe veprimet çnjerëzore që janë kryer kundër popullit sirian. Udhëheqësit kanë rënë në një mendje për nevojën e ruajtjes së unitetit në Siri dhe për ndërprerjen e menjëhershme të dhunës me pezullimin e Sirisë nga Organizata e Bashkëpunimit Islamik."

Në një deklaratë të kësaj organizate bëhet gjithashtu thirrje për një përfundim të menjëhershëm të luftimeve në Siri.

Sekretari i Parlamentit sirian Khaled Aboud shprehet se pezullimi i Sirisë nga Organizata e Bashkëpunimit Islamik nuk do të ketë asnjë ndikim negativ mbi vendin e tij. (Artani)