Përfaqësuesit e më shumë se 30 vendeve, përfshirë Kinën, Rusinë, Irakun dhe Jordaninë u mblodhën në Teheran për të diskutuar mënyrat për zgjidhjen e krizës në Siri.

Konferenca u refuzua nga SHBA-ja, që ka akuzuar Iranin se po ndihmon presidentin sirian Bashar al-Asad të vrasë bashkëkombasit e tij.

Ministri i jashtëm iranian, Ali Akbar Salehi paraqiti rezultatet e bisedimeve.

"U propozua që të krijohet Grupi i Kontaktit, i përbërë nga përfaqësuesit e vendeve neutrale, për të menaxhuar situatën me të dyja palët dhe për t'i hapur rrugën mirëkuptimit të ndërsjelltë, ndërveprimit dhe dialogut", tha Salehi.

Ai shtoi se si pengesa më e madhe për armëpushimin, ndihmat humanitare, dialogun e zgjidhjen paqësore të çështjes, mbetet një ndërhyrje e mundshme ndërkombëtare. (Ardi Pulaj)