Greqia mund ta kapërcejë krizën e tanishme të borxhit dhe të qëndrojë brenda një Eurozone të qëndrueshme, ndonëse do t'i duhet të vazhdojë reformat e dhimbshme, por të domosdoshme strukturore, u shprehën të enjten në Athinë kryeministri grek Antonis Samaras dhe kryetari i Komisionit Europian Jose Manuel Barroso.

Z. Barroso theksoi se të gjitha shtetet anëtare kanë deklaruar se Greqia duhet të qëndrojë në Eurozonë për sa kohë që ajo mban premtimet e bëra në marrëveshjet e ndihmës të nënshkruara që nga viti 2010 me huadhënësit ndërkombëtarë, në mënyrë që të shmangë moskthimin e borxhit dhe një dalje të mundshme nga zona e monedhës së përbashkët.

Kreu i Komisionit Europian u dërgoi gjithashtu një mesazh kritikëve më të zjarrtë në gjirin e zyrtarëve evropianë, të cilët sipas tij "nganjëherë duket se nuk e kuptojnë që jemi të tërë në të njëjtën barkë".

Nga ana e tij, kryeministri i Greqisë Samaras përsëriti vendosmërinë e vendit të vet për të vazhduar reformat strukturore dhe privatizimet, me qëllim zvogëlimin e deficitit dhe rikthimin e rritjes së ekonomisë. "Ne do të bëjmë gjithçka të nevojshme për rimëkëmbjen ekonomike," tha kreu i qeverisë helene, duke shprehur optimizëm për rezultatet e këtyre përpjekjeve. (Artani)