Në samitin e BE-së në Bruksel disa udhëheqës evropianë i bënë thirrje Merkelit të tregohet elastike që ky takim të arrijë sukses.
Kryetari i grupit liberaldemokrat në Parlamentin Europian Graham Watson shprehet:
"Nuk besoj se Angela Merkeli u tha anëtarëve të partisë së vet se nuk do të ketë eurobono sa të jetë gjallë ajo, por mendoj se është e rëndësishme që çdo vend të tregojë vullnet për kompromis e për gjetjen e një rruge për të ecur përpara".
Disa vende të BE-së, duke përfshirë Italinë, Francën e Spanjën, kanë mbështetur idenë e eurobonove, sepse ato do të ulin përqindjet e huamarrjes të vendeve me borxhe. Por Merkeli ngurron ta ngarkojë Gjermaninë me kosto të tjera dhe është e shqetësuar se eurobonot do ta pakësojnë trysninë mbi vende si Greqia e Spanja për të reformuar ekonomitë e tyre. Ajo ka mbështetjen edhe të udhëheqësve suedezë e holandezë. (Artani)