Ministri i brendshëm i Shqipërisë, Bujar Nishani u zgjodh të hënën në postin e presidentit të Republikës.

Gjatë votimit në raundin e katërt në Parlament, për kandidaturën e 45 vjeçarit Nishani, 73 deputetë votuan pro, nga 76 pjesëmarrës në votim, një votoi kundër, ndërsa dy fletë u shpallën të pavlefshme. Ligjvënësit e opozitës, të cilët ishin në sallë, nuk u bënë pjesë e procesit të votimit. Më herët kreu i PS-së, Edi Rama deklaroi se nuk do të pranohej kandidatura e mazhorancës.

Nishani do të pasojë Bamir Topin për pesë vitet e ardhshme në postin e kreut të shtetit, duke nisur nga 24 korriku.

Zgjedhja e Bujar Nishanit u bë në një kohë kur Parlamenti ezauroi pa votim tre raundet e para, edhe pse me kandidatura joformale si në rastin e Xhezair Zaganjorit dhe formale në rastin e Artan Hoxhës. Por që të dy, u tërhoqën në momentet e fundit, përpara votimit. (Ardi Pulaj)