Pekini dhe Moska konfirmuan se presidenti rus Vladimir Putin do të vizitojë të martën e ardhshme Kinën. Gjatë vizitës dy ditore, ai do të marrë pjesë edhe në samitin e Organizatës së Bashkëpunimit të Shangait. Kjo do të jetë vizita e parë zyrtare e Putinit jashtë shtetit, që nga rizgjedhja në krye të Kremlinit.

Zv/ministri i jashtëm kinez, Cheng Guoping thotë se samiti pritet që të arrijë rezultate konkrete.

"Samiti i Pekinit do të identifikojë drejtimin e O.B. të Shangait dhe detyrat kryesore për dekadën e ardhshme dhe miratimin e planit strategjik për zhvillim afatmesëm", tha Cheng Guoping.

Samiti do të fokusohet tek siguria dhe çështjet ekonomike. Me vende anëtare si Kina, Rusia dhe Kazakistani, O.B. e Shangait po shqyrton mundësinë e pranimit të Afganistanit si anëtar me status vëzhguesi dhe Turqinë si partnere në dialog. (Ardi Pulaj)