Nuk janë raportuar detaje nga takimi, por thuhet se është diskutuar rreth planit gjashtë-pikësh të zotit Annan dhe masakrës së fundit që vrau më shumë se 100 njerëz në fshatin Houla të krahinës qendrore Homs.
Një ditë më parë, Annan u tha gazetarëve se ai pret që të ketë diskutime "serioze dhe të sinqerta" me zotin Asad.
Annan i bëri thirrje zotit Assad të përmbushë planin e tij të paqes.
Papara takimit me al-Assad, Annan takoi zëvendësministrin e Jashtëm të Sirisë Faisal Miqdad.
Miqdad e përshkroi takimin si pozitiv dhe frytdhënës.
"Ne ofruam të gjitha lehtësitë për të përmbushur dislokimin dhe shpërndarjen e Misionit të Vëzhguesve të Kombeve të Bashkuara në të gjithë Sirinë. Ne ofruam gjithçka të nevojshme për punën e tyre pa asnjë pengesë. Më e rëndësishmja që duhet theksuar është se Siria, gjatë kësaj kohe, nuk ka kryer as edhe një thyerje të vetme të planit të paqes të zotit Annan as edhe memorandumin e mirëkuptimit të nënshkruar midis Sirisë dhe Kombeve të Bashkuara."
Miqdad insistoi se qeveria siriane është e angazhuar të përmbushë planin e përpiluar nga Annan.
Ai ndërkohë akuzoi rebelët dhe forcat e opozitës për anashkalimin e planit.
Megjithatë, plani i paqes i Ananit duket gjithnjë e më i dobët pas masakrës në Houla ku më shumë se 100 njerëz u vranë.
Kombet e Bashkuara thanë se forcat e qeverisë siriane sulmuan me predha tankesh dhe artileri të rëndë fshatin Houla ku ndodhi masakra.
Megjithatë, OKB-ja nuk fajëson plotësisht qeverinë siriane për masakrën. (Leftion Peristeri)
