Ekipi paraprak prej gjashtë anëtarësh, që ka për detyrë të mbikqyrë armëpushimin e brishtë në Siri, po tenton të vendosë kontakte me qeverinë dhe opozitën për të diskutuar mbi aksionet e tyre.

"Ne do të organizohemi dhe do të përgatitemi për të nisur detyrën tonë sa më parë që të jetë e mundur. Tashmë ne jemi këtu dhe të gjithë ata që janë në favor të paqes janë optimistë", tha Ahmed Himmiche, kryesues i ekipit vëzhgues të OKB-së.

Më shumë vëzhgues pritet të shkojnë në Siri në ditët e ardhshme dhe mendohet se 200 do të vendosen në terren.

Pavarësisht kësaj, luftimet në Siri kanë vijuar. Autoritetet e vendit thanë se grupe të armatosura sulmuan efektivët e policisë, duke shkaktuar nëntë të vdekur. Ndërsa opozita bëri të ditur se trupat qeveritare siriane vijuan për të tretën ditë me rradhë bombardimin e qytetit Homs. (Ardi Pulaj)