Gazeta "Uashington Post", në një artikull në numrin e së premtes shkruan se presidenti amerikan Barak Obama i ka përcjellë një mesazh udhëheqësit më të lartë të Iranit, Ajatollah Ali Komeneit, se nëse Teherani nuk zhvillon armë bërthamore, atëherë mund të vijojë me programin për qëllime civile.

Sipas gazetës, mesazhi iu përcoll Khameneit nëpërmjet kryeministrit turk, Rexhep Taip Erdoan, teksa ky i fundit vizitoi Iranin javën e kaluar.

"Disa ditë përpara vizitës në Iran, Erdoan zhvilloi një takim dy orësh me Obamën në kryeqytetin koreanojugor, Seul, ku diskutuan për mesazhin që kryeministri turk do t'i përcillte Komeneit", shkruan gazeta.

Irani pritet që të rinisë të premten e ardhshme bisedimet për programin bërthamor me SHBA-në, Britaninë e Madhe, Francën, Rusinë, Kinën dhe Gjermaninë. (Vera/ Ardi Pulaj)