"Ky mund të jetë shansi i fundit për Sirinë për të shmangur një luftë të gjatë dhe të përgjakshme civile. Prandaj ne do t'ju ofrojmë çdo ndihmë të nevojshme në çdo nivel dhe në drejtime të ndryshme me aq sa ka mundësi Rusia. Dhe shpresojmë vërtet që përpjekjet tuaja të përfundojnë me një rezultat pozitiv. "
Ndërsa z. Anan tha në takim se një ndër përparësitë e tij mbetet sigurimi i vijimit të ndihmës humanitare për Sirinë:
"Mendoj se keni të drejtë kur thoni se Siria ka një mundësi sot për të punuar me mua dhe me këtë proces ndërmjetësimi për t'i dhënë fund konfliktit, luftimeve, dhe për të lejuar ndihmën humanitare për ata që kanë nevojë, si edhe për të nisur procesin politik që do të çojë në një zgjidhje paqësore. "
Kofi Anani zhvilloi bisedime me zyrtarët rusë gjatë fundjavës në përpjekje për ta bindur Rusinë ta ashpërsojë qëndrimin ndaj Sirisë. Rusia është mbrojtësi kryesor ndërkombëtar i Sirisë dhe ka një numër interesash në atë vend, duke përfshirë shfrytëzimin e një porti detar.
Rusia dhe Kina iu bashkuan pjesës tjetër të Këshillit të Sigurimit të OKB-së javën e kaluar, duke mbështetur planin e Kofi Ananit për t'i dhënë fund konfliktit.
Z. Anan do të udhëtojë në Kinë të martën për të zhvilluar bisedime me zyrtarët vendës rreth problemit sirian. (Artani)
