Pavarësisht mos arritjes së një konsensusi më herët në Këshillin e Sigurimit, OKB-ja nuk i ndali përpjekjet për situatën në Siri. Të enjten, Asambleja e Përgjithshme e OKB-së, kaloi me shumicë votash një rezolutë që mbështet Lidhjen Arabe për t'i dhënë fund dhunës në Siri. Rezoluta kërkon gjithashtu emërimin e një të dërguari të posaçëm të OKB-së për Sirinë.

Rezoluta është e ngjashme me atë të bllokuar me veto nga Kina dhe Rusia në Këshillin e Sigurimit të OKB-së në fillim të muajit, duke shprehur përkrahje për propozimin e Lidhjes Arabe në zgjidhjen e krizës dhe duke dënuar veprimet e qeverisë siriane kundër forcave opozitave.

Po të enjten Parlamenti Europian miratoi një rezolutë për Sirinë, ku kërkon vendosjen e sanksioneve të reja. Rezoluta e PE-së u kërkon vendeve anëtare të BE-së të tërheqin ambasadorët e tyre dhe njëkohësisht të ndalojnë kontaktet diplomatike me Sirinë.

Ajo dënon ashpërsimin e dhunës dhe gjithashtu i bën thirrje presidentit Bashar al Assad të largohet nga pushteti. Nga ana tjetër, rezoluta i kërkon BE-së të forcojë përkrahjen politike e teknike ndaj forcave opozitare. (U Sen/Leftion Peristeri)