Presidenti grek Karolos Papoulias, me gjestin simbolik të ofrimit të rrogës së tij vjetore, ka shprehur vendosmërinë e vendit për t'i shpëtuar krizës së borxheve.

Rroga vjetore e presidentit Papoulias, që llogaritet në 280 mijë euro, është një kontribut për paketën prej 350 milion euro që Greqia duhet të kursejë. Ministri grek i Financave, Evangelos Venizelos, duke njoftuar lajmin shtoi se gjesti i presidentit tregon praninë e tij krah popullit grek që po vuan shumë nga politika e shkurtimit buxhetor.

Zoti Venizelos tha se Greqia ndodhet në një çast kritik, pasi një sërë problemesh kanë dalë në raundin e dytë të dhënies së kredisë prej 130 miliardë euro, probleme të cilat ende janë të pazgjedhura.

Për shkak të pakënaqësive që ka shkaktuar Greqia me mospërmbushjen e kresave të BE-së për marrjen e kredisë prej 130 miliardë eurosh, ministrat e Financave të Eurozonës e zëvendësuan takimin që duhet të mbahej të mërkurën (15 shkurt), me një konferencë telefonike. (Wang Xianya/Leftion Peristeri)