Zëdhënësi i Ministrisë së Naftës, Alireza Nikzad Rahbar tha se embargoja mund të tërhiqet përpara se të hyjë në fuqi.
"Kjo çështje pikësëpari është propagandë. Ka mundësi të bëhet realitet, prandaj BE ka kërkuar gjashtë muaj, për të testuar tregun dhe më pas të zbatojë sanksionet. Megjithatë, kjo propagandë do t'a dëmtojë BE-në, sepse nafta po shtrenjtohet. Nëse çmimi i naftës vijon të rritet, vendet europiane do të përballen me probleme", tha Rahbar
Udhëheqësit europianë vendosën një embargo të menjëhershme për kontratat e reja që kanë lidhje me naftën iraniane dhe nënproduktet e saj, por lejuan zbatimin e kontratave aktuale deri në verë.
Sanksionet europiane gjithsesi nuk patën impakt të dukshëm në çmimin e naftës në tregjet ndërkombëtare.
Ndërkohë luftëanijet e Shteteve të Bashkuara të Amerikës, të shoqëruara dhe nga ato britanike dhe franceze, bënë kalimin e një aeroplan-mbajtëseje në Ngushticën e Hormuzit, të cilën autoritetet iraniane kanë kërcënuar se do t'a mbyllin në shenjë proteste ndaj sanksioneve të BE-së. (Ardi Pulaj)
