Më 1 maj, në orën 8 e 30 paradite, u zhvillua ceremonia e hapjes së parkut të Ekspozitës Botërore të Shangait për vitin 2010 duke filluar pritjen e vizitorëve. Parashikohet se gjatë 184 ditëve të ardhshme, 70 milionë turistë kinezë dhe të huaj do të vizitojnë parkun e EXPO-s për t'u njohur me kultura të ndryshme dhe teknologji të përparuara. Organizuesit e EXPO-s janë gati t'u ofrojnë vizitorëve një shërbim sa më të mirë.

Në ceremoninë e hapjes, sekretari i përgjithshëm i Agjencisë Ndërkombëtare të Ekspozitës Vicente Loscertales shprehu shpresë se në 6 muajt e ardhshëm, komuniteti ndërkombëtar do të bashkëpunojë ngushtë për suksesin e EXPO-s duke zhvilluar konsultime për zhvillimin e ardhshëm të qytetit:

"Ekspozita Botërore e Shangait për vitin 2010 është një takim madhështor që shfaq rezultatet e progresit të njerëzimit. Ekspozita do t'i inkurajojë njerëzit të kërkojnë idenë 'Qyteti më i bukur, jeta më e mirë'. Jam i bindur se kjo ekspozitë do t'u lërë vizitorëve një përshtypje të bukur."

Në fjalimin e mbajtur në ceremoninë e hapjes, kryetari i komitetit kombëtar të Konferencës Konsultative Politike të Popullit Kinez Jia Qinglin u shprehu vizitorëve mirëseardhje për Ekspozitën Botërore të Shangait:

"Le të takohemi në parkun e EXPO-s për të parë së bashku pavijonet me stilin e posaçëm, rezultatet tekniko-shkencore duke u njohur me kërkimet e palodhshme të njerëzimit për progres."

Për pritjen e vizitorëve, organizuesit e Ekspozitës Botërore të Shangait kanë bërë përgatitje të shumta. Në fund të prillit, ata organizuan 6 herë prova duke inspektuar në mënyrë të gjithanshme pajisjet e parkut dhe aftësinë e pritjes. Sipas gjendjes aktuale, organizuesit do të shtojnë gradualisht numrin e vullnetarëve për t'u ofruar vizitorëve një shërbim sa më të mirë. (Fani)(Albana)