Më 10 prill u hap në Boao të Kinës Jugore takimi vjetor i Forumit Aziatik të Boao-s. Tema e këtij takimi është "Rimëkëmbja e gjelbër, zgjedhja e vërtetë e Azisë për zhvillimin e vazhdueshëm". Nënkryetari i Shtetit i Kinës, Xi Jinpin u shpreh në ceremoninë e hapjes se për realizimin e zhvillimit të gjelbër dhe të vazhdueshëm të Azisë dhe të botës, vendet aziatike duhet të trajtojnë në mënyrë përpjesëtimore rritjen ekonomike, përparimin shoqëror dhe mbrojtjen e mjedisit dhe për këtë qëllim, Kina është e gatshme që të përpiqet së bashku me të gjitha vendet aziatike.

Forumi Aziatik i Boao-s, i krijuar në vitin 2001, ka bërë përpjekje për nxitjen e realizimit të objektivave të zhvillimit të vendeve aziatike, nëpërmjet integrimit të mëtejshëm të ekonomive rajonale. Këtë vit, në sfondin e rimëkëmbjes së ngadalshme dhe të brishtë të ekonomisë botërore, të gjithë pjesëmarrësit e këtij takimi të forumit po i kushtojnë vëmendje realizimit të zhvillimit përpjesëtimor ndërmjet zhvillimit ekonomik, shoqëror dhe mjedisor, gjatë procesit të daljes nga kriza.

Në fjalën e tij të mbajtur në ceremoninë e hapjes së takimit 2010 të Forumit Aziatik të Boao-s, nënkryetari i Shtetit i Kinës, Xi Jinping tha për mëse 30 vjet me radhe, pas reformës dhe hapjes, Kina ka realizuar një rritje të shpejtë dhe të vazhdueshme ekonomike, mesatarisht 9.8% në vit. Mirëpo bëhet gjithnjë e më i dukshëm frenimi i zhvillimit kushtëzuar nga mjedisi dhe burimet, gjë që nxit Kinën të ndryshojë mënyrën e zhvillimit, të rritë cilësinë dhe efektivitetin e zhvillimit dhe të nxitë zhvillimin e gjelbër dhe të vazhdueshëm.

Xi Jinping tha se për këtë qëllim, që nga viti 2007, Kina ka filluar të heqë mënyrat e prapambetura të prodhimit, duke mbyllur një numër të madh ndërmarrjesh të vogla me ndotje të madhe, si termocentrale të vogla, fabrika të vogla të çelikut, të çimentos, të prodhimit të letrës, të industrisë kimike etj. Në të njëjtën kohë, Kina ka zhvilluar me shumë forcë energjinë e pastër. Në vitin 2009 Kina zuri në vendin e parë në botë për kapacitetin e instalimeve të hidrocentraleve, përmasat e centraleve bërthamore ekzistuese, sipërfaqen e pajisjeve të ngrohjes me energji diellore, si dhe për prodhimin e energjisë elektrike nëpërmjet energjisë diellore.

Xi Jinping u shpreh se Kina i qëndron mendimit se përballimi i ndryshimit të klimës ka të bëjë me interesat e të gjitha vendeve në botë dhe vendet e ndryshme duhet të veprojnë bashkërisht duke ndjekur parimin e 'detyrimeve të përbashkëta por të ndryshme'."

Në këtë takim vjetor që do të mbyllet më 11 prill, marrin pjesë mbi 2 mijë liderë qeveritarë, sipërmarrës, dijetarë të njohur dhe përfaqësues të organizatave ndërkombëtare. Vitin e kaluar, në takimin e këtij forumi 2009, mori pjesë edhe kryeministri i Shqipërisë, Sali Berisha. (Wang Lei)