Rama dhe Manastirliu (Foto RTSH)

Urgjenca Kombëtare tashmë është kthyer në një repart ekselence të shërbimit shëndetësor shqiptar, deklaroi kryeministri Edi Rama, ndërsa inspektoi së bashku me ministren e Shëndetësisë, Ogerta Manastirliu, flotën e re të autoambulancave që i janë shtuar Qendrës Kombëtare të Urgjencës Mjekësore.  

“Nga një karakatinë, sot Urgjenca Kombëtare është kthyer në një repart ekselence i shërbimit shëndetësor shqiptar, ku vazhdojnë investimet dhe përmirësimet duke synuar papushim optimalen, shërbimin për qytetarët në nevojë për kujdes të menjëhershëm shëndetësor”,- deklaroi kryeministri Rama, citon “RTSH”.  

Ministrja Manastirliu deklaroi se autoambulancat janë të pajisura me të gjitha aparaturat e domosdoshme. Sipas saj, nga viti 2018 deri tani numri i autoambulancave të reja ka shkuar në 110.  

“Ne kemi shtuar flotën tonë të autoambulancave në Qendrën Kombëtare të Urgjencës Mjekësore me 8 njësi të reja. Ato pritet të bëhen operacionale, duke rritur kështu shërbimin ndaj qytetarëve. Autoambulancat janë të tipit C, të pajisura me të gjitha aparaturat. Prej 2018-s deri tani janë 110 autoambulanca të reja, kemi 127 stacione në të gjithë vendin. Kemi përgjysmuar kohën e mbërritjes në vendngjarje. Kjo gjë ka rritur besimin te qytetarët”,- tha ministrja.  

Sipas saj, me buxhetin e vitin 2023 do të zgjerohet flota e autoambulancave dhe do të fuqizohen spitalet dhe postacionet në vijën bregdetare. (Elona)