Foto nga VCG
Kryeministri suedez, Ulf Kristersson, premtoi se do të përmbushë kërkesat turke të sigurisë në përpjekje për të marrë miratimin e Turqisë për ofertën e vendit të tij për t'u bashkuar me NATO-n.
“Ne do të zbatojmë plotësisht memorandumin trepalësh”,- tha Kristersson në një konferencë të përbashkët shtypi me presidentin turk Rexhep Tajip Erdogan në kryeqytetin Ankara.
“Suedia do të ndërmarrë hapa të rëndësishëm në lidhje me luftën kundër terrorit”,- shtoi ai.
Suedia planifikon të prezantojë legjislacion të ri deri në vitin 2023 për të luftuar grupet terroriste, pavarësisht nëse ato përbëjnë rrezik për Suedinë apo Turqinë, vuri në dukje lideri suedez, citon “Xinhua”.
Kristersson tha se vendi i tij e ka cilësuar Partinë e jashtëligjshme të Punëtorëve të Kurdistanit (PKK) si një organizatë terroriste dhe qeveria e tij ishte e gatshme të mbështeste Turqinë në luftën e saj kundër grupit.
“Bashkimi në këtë aleancë është një çështje jetike e sigurisë për ne. Të jesh një anëtar i NATO-s do të thotë të marrësh përgjegjësinë e sigurisë për aleatët e tjerë”,- shtoi ai.
Kristersson zhvilloi bisedime me Erdogan në përpjekje për të bindur udhëheqësin turk të miratojë ofertën e Suedisë për t'u bashkuar me NATO-n.
“Suedia dëshiron anëtarësimin në NATO për sigurinë e saj dhe ne duam të shohim një Suedi që mbështet shqetësimet tona të sigurisë”, - tha Erdogan.
Oferta e Finlandës dhe Suedisë në NATO fillimisht u bllokua nga Turqia, e cila i akuzoi për mbështetje të grupeve anti-turke pasi refuzuan kërkesat e Ankarasë zyrtare për ekstradim për të dyshuarit e lidhur me PKK-në dhe Lëvizjen Gulen.
Më 28 qershor, Turqia, Suedia dhe Finlanda arritën një memorandum trepalësh mirëkuptimi përpara samitit të NATO-s në Madrid.
Suedia dhe Finlanda u zotuan të mbështesin luftën e Turqisë kundër terrorizmit dhe ranë dakord të trajtojnë kërkesat e pezulluara të Ankarasë për dëbim ose ekstradim për të dyshuarit për terrorizëm në mënyrë të shpejtë dhe të plotë.
Turqia mbetet një nga dy anëtarët e NATO-s për të ratifikuar ende pranimin e tyre, pasi Ankaraja është ankuar se të dy vendet kanë ecur shumë ngadalë në përmbushjen e angazhimeve të tyre lidhur me shqetësimet turke të sigurisë. (Elona)
