Foto:VCG
Kancelari gjerman, Olaf Scholz, u zotua se do të ofrojë ndihmë të gjerë në rindërtimin e Ukrainës, duke përfshirë ndihmën për bujqësinë, sektorin shëndetësor dhe restaurimin e rrjeteve energjetike të vendit.
“Së bashku me partnerët tanë, ne do të mbështesim Ukrainën për aq kohë sa të jetë e nevojshme”,- tha Scholz në hapjen e një forumi biznesi gjermano-ukrainas në Berlin, citon “Xinhua”.
Rindërtimi i Ukrainës do të kushtojë 349 miliardë dollarë amerikanë, sipas një analize të publikuar muajin e kaluar nga Banka Botërore, Bashkimi Evropian (BE) dhe qeveria e Ukrainës.
“Nevojat e Ukrainës për rimëkëmbje dhe rindërtim janë masive dhe në rritje”,- tha presidenti i Bankës Botërore, David Malpass, në fillim të këtij muaji.
Ndërkohë, kryeministri ukrainas Denys Shmyhal ka vlerësuar se kostoja e rindërtimit në vend do të jetë deri në 750 miliardë dollarë amerikanë.
Scholz premtoi se kompanitë gjermane do të investojnë në Ukrainë, duke theksuar se kushdo që investon në rindërtimin e Ukrainës sot, investon në një shtet të ardhshëm anëtar të BE-së.
Ukraina është kandidate për anëtarësim në BE që nga qershori dhe Scholz përsëriti mbështetjen e Gjermanisë për pranimin e saj. (Elona)