Jetesa e përditshme është bërë më e lehtë nga kompanitë që ofrojnë pajisje teknologjike “smart”, që mjafton vetëm shtypja e një butoni në një aparaturë apo në telefonat inteligjentë për t’i vënë në funksionim. Synimi i kompanisë prodhuese të tyre është që të avancojnë me teknologjitë mbështetëse për t’i bërë më komode për të gjitha moshat dhe të arrijnë në të gjitha nivelet e shoqërisë.

Teknologjia e zgjuar e bën më komode jetën e përditshme

Pajisjet shtëpiake bëhen gjithnjë e më të lehta për përdoruesit, të thjeshtuara nga aplikacionet dhe koordinimi më i mirë.

Vizitorët përjetojnë produkte shtëpiake të zgjuara gjatë një ekspozite të teknologjisë së lartë në Shenzhen, provincën Guangdong, në gusht. Dërgesat e pajisjeve shtëpiake inteligjente në Kinë pritet të rriten me 17.1 për qind nga viti në vit për të tejkaluar 260 milionë njësi këtë vit. LIANG XU/XINHUA

Su Ying, ekspert i teknologjisë në Shenzhen, në provincën kineze Guangdong, është gjithmonë i etur për produktet më të fundit të pajisjeve të zgjuara. Ai ka më shumë se 50 pajisje inteligjente në shtëpinë e tij, por ato nuk janë gjithmonë aq “smart” sa ai mendon se duhet të jenë.

“Pajisjet inteligjente të shtëpisë duhet të kontrollohen nëpërmjet katër aplikacioneve të ndryshme nën menaxhim të veçantë. Edhe pse tani mund të përdor një aplikacion për të fikur dritat në dhomën e ndenjjes, ndërsa jam fizikisht në dhomën e gjumit, dhe të autorizoj përdorimin e bravave digjitale të dyerve për familjarëve të mi, hasa në tre probleme të mëdha”,- tha Su.

I gjithë menaxhimi duhet të bëhet përmes telefonit inteligjent dhe është jashtëzakonisht e vështirë të lidhësh telefonin me 50 pajisje të tjera inteligjente shtëpiake. Ndërkohë, lidhjet janë të paqëndrueshme. “Kur ka më shumë se 10 pajisje inteligjente, fillova të ndihem i çorientuar. Në fakt, shumë prej tyre janë më pak të përdorura dhe përfundojnë si dekorime të padobishme”, shtoi ai.

Su bën pjesë në atë kategori të konsumatorëve kinezë, tashmë në rritje, të gatshëm për të përqafuar produktet inteligjente të shtëpisë, duke e bërë industrinë e shtëpive inteligjente të vendit një industri edhe më premtuese në vitet në vijim.

Dërgesat e pajisjeve inteligjente të shtëpisë në Kinë pritet të rriten 17.1 për qind nga viti në vit për të tejkaluar 260 milionë njësi në vitin 2022, ndërsa optimizimi dhe përmirësimet e shtëpive inteligjente vazhdojnë, sipas firmës së kërkimit të tregut me bazë në Shtetet e Bashkuara, “International Data Corp” (IDC).

Dërgesat pritet të rriten me një normë të përbërë rritjeje vjetore prej 21.4 për qind për të arritur në 540 milionë njësi në vitin 2025 dhe vlera e tregut deri atëherë do të kalojë 800 miliardë juanë (115.8 miliardë dollarë), bëri të ditur “IDC”.

nga VCG

Tendenca është në përputhje me një raport global nga ofruesi amerikan i shërbimeve të komunikimit të personalizuar “Plume”. Kompania zbuloi se përdoruesit e teknologjisë shtëpiake kanë dëshirë në rritje për teknologjitë inteligjente të shtëpisë. Në mënyrë të veçantë, në baza globale, numri mesatar i pajisjeve për shtëpi ishte 17.1 në fund të qershorit 2022, 10 për qind më shumë krahasuar me të njëjtën periudhë të një viti më parë.

“Ndërsa problemet me të cilat përballet Su po bëhen gjithnjë e më të zakonshme në grupin e konsumatorëve, ne presim që teknologjitë inteligjente të shtëpisë të përshpejtojnë përmirësimet, për shkak të rritjes së një tregu shërbimesh plotësisht të menaxhuara, së bashku me evolucionin në ndërveprimet përdorues-pajisje, përmirësimet në lidhje dhe kanalet e zgjeruara të shitjeve”,- tha Quorra Liu, analist i lartë i tregut për kërkimin e pajisjeve, në “IDC China”.

Sipas “IDC”, teknologjia 5G dhe inteligjenca artificiale do të luajnë role kyçe në forcimin e lidhjes së pajisjeve të ndryshme inteligjente të shtëpisë në skenarë të ndryshëm aplikimesh dhe lehtësimin e ndërveprimit midis qenieve njerëzore dhe makinerive.

Teknologji të tjera më të avancuara, si ndërveprimi i zërit dhe njohja e fytyrës, janë aplikuar gradualisht në altoparlantët inteligjentë, pajisjet e mbikëqyrjes së sigurisë dhe pajisjet e tjera inteligjente të shtëpisë, për të përmirësuar përvojën e përdoruesit dhe për të pasuruar funksionet e tyre, shtoi “IDC”, duke theksuar se kjo është pikërisht mënyra se si kompanitë kineze po punojnë për të zgjidhur problemet.

Ata po punojnë shumë për të përmirësuar zgjidhjet e produkteve të tyre të mundësuara nga teknologjitë e reja. “Huawei  Technologies Co”, për shembull, zbuloi projektin e saj të shtëpisë inteligjente që ofron një grup të plotë pajisjesh shtëpiake inteligjente për të mbuluar një sipërfaqe prej 550 metrash katrorë në total, duke përfshirë veçanërisht një dhomë ndenjjeje, një kuzhinë, një dhomë studimi, një palestër në shtëpi, një dhomë argëtimi dhe një garazh.

Shao Yang, shefi i strategjisë së grupit të biznesit të pajisjeve të “Huawei”, tha se kompania synon të ndryshojë përqendrimin e qasjes nga pajisjet te njerëzit, pra, duke e lënë hapësirën e shtëpisë të mirëpresë njerëzit dhe t'u shërbejë më mirë përdoruesve.

Kompania bëri të ditur se “Huawei” synon t'i mundësojë çdo përdoruesi një shërbim më të rehatshëm dhe inteligjent në shtëpi, duke riintegruar hapësirat dhe duke i vendosur pajisjet në mënyrë më të rregullt, ndryshe nga ato tradicionale të instalimit të produkteve inteligjente të pavarura e të palidhura.

Në mënyrë të veçantë, duke përdorur teknologjitë me valë, produktet e “Huawei”, duke përfshirë telefonat, PC-të, tabletet, orët, altoparlantët inteligjentë dhe televizorët inteligjentë, janë të integruara me produkte nga partnerët e ekosistemit të kompanisë, për të ofruar një përvojë të rehatshme, inteligjente dhe gjithëpërfshirëse në shtëpi inteligjente.

Në dhomën e ndenjjes, duhen vetëm disa fjalë për të zgjuar asistentin inteligjent dhe për të aktivizuar modalitetin “Kthim në shtëpi”. Në këtë mënyrë, pastruesit e ajrit dhe ndriçimi i ngrohtë janë të ndezur, madje edhe perdet janë të mbyllura. Këto pajisje të lidhura mund të kontrollohen të gjitha duke përdorur të njëjtin asistent inteligjent, bëri të ditur “Huawei”.

Në kuzhinë, konsumatorët mund të gjejnë një funksionim të plotë të pajisjeve shtëpiake të mundësuara nga sistemi operativ i vetëzhvilluar i “Huawei”, “HarmonyOS”. Sipas Shao, vetëm duke shtypur butonat e caktuar në telefon bëhet lidhja e objekteve.

Tenxheret elektrike, përpunuesit e ushqimit dhe pajisjet e tjera të kuzhinës kanë receta të integruara, duke e bërë më të lehtë se kurrë gatimin si mjeshtër kuzhinier.

Funksione të tilla janë aktivizuar pjesërisht nga “HarmonyOS”. Yu Chengdong, CEO-ja i grupit të biznesit të pajisjeve të “Huawei” dhe i njësisë së biznesit të zgjidhjeve inteligjente të automobilave të kompanisë, deklaroi në korrik se më shumë se 300 milionë pajisje të kompanisë tani kanë të integruar “HarmonyOS 2”, gjë që e bën atë sistemin operativ me rritjen më të shpejtë në botë.

Ndërkohë, më shumë se 170 milionë produkte të palëve të treta të pajisura me “HarmonyOS Connect” për funksionalitetin “IoT” janë dërguar gjithashtu nga fabrikat te shitësit me pakicë në të gjithë Kinën, tha Yu.

Xiang Jiangxu, zv.president dhe shef i teknologjisë IoT të prodhuesit të pajisjeve shtëpiake “Midea”, tha se “HarmonyOS” mbuloi pothuajse të gjitha kategoritë e produkteve të kompanisë, rreth 200 lloje, vitin e kaluar.

nga VCG

Përveç “Huawei”, shitësi kinez i smartfonëve “Xiaomi Corp” po përpiqet gjithashtu të hyjë në tregun e shtëpive inteligjente duke përmirësuar ndërlidhjen në të gjithë skenarët e përdorimit dhe duke zgjeruar gamën e larmishme të produkteve të jetesës së zgjuar. Në tremujorin e dytë, të ardhurat e “Xiaomi” nga IoT dhe produktet e stilit të jetesës arritën në 19.8 miliardë juanë, me shumë kategori produktesh IoT që arritën rritje solide në tregun vendas.

Prodhuesit tradicionalë të pajisjeve shtëpiake po përshpejtojnë gjithashtu hapat për të lançuar produkte inteligjente shtëpiake si kondicionerët, televizorët, frigoriferët dhe lavatriçet duke aplikuar teknologjitë 5G, inteligjencën artificiale dhe IoT.

Frigoriferët që mund të monitorojnë freskinë e ushqimeve, të ndihmojnë përdoruesit të porosisin përbërës dhe të rekomandojnë receta duke analizuar zakonet dhe preferencat e përdoruesve, për shembull, janë bërë realitet në jetën e përditshme të njerëzve.

“Në epokën e 5G dhe IoT, ajo që u nevojitet përdoruesve nuk janë produkte homogjene, por zgjidhje të personalizuara për të përmbushur jetesën individuale.

Ne jemi të gatshëm të prezantojmë shërbime të personalizuara për më shumë familje”,- tha Li Huagang, president i “Haier Smart Home”, filial i prodhuesit më të madh kinez të pajisjeve shtëpiake “Haier Group”.

Përpjekje të tilla shoqërohen gjithashtu me propozimet e qeverisë qendrore për të promovuar konsumin e pajisjeve shtëpiake të gjelbra dhe inteligjente, si pjesë e përpjekjeve për të stabilizuar rritjen dhe për të zgjeruar punësimin.

Një udhëzues, i propozuar bashkërisht nga Ministria e Tregtisë dhe departamente të tjera qeveritare, duke përfshirë Ministrinë e Industrisë dhe Teknologjisë së Informacionit dhe Administratës Shtetërore për Rregullimin e Tregut, u publikua në fillim të këtij viti për të inkurajuar ndërmarrjet të zhvillojnë produkte të zgjuara për shtëpi që janë gjithashtu të disponueshme në tregjet rurale dhe plotësojnë kërkesat e qytetarëve të moshuar.

Zhao Meimei, zëvendëspresident i “All View Cloud”, tha se për realizimin e pajisjeve inteligjente për shtëpitë ka pasur edhe sfida dhe vështirësi.

“Produktet inteligjente të shtëpisë të prodhuara nga kompani të ndryshme zakonisht nuk mund të lidhen dhe ne ende mbështetemi te furnizuesit e huaj për çipa inteligjentë të nivelit të lartë. Do të duhen ende disa vite për të parë aplikimin në shkallë të gjerë të pajisjeve shtëpiake inteligjente”,- tha Zhao.