Frutat ekzotike përmbajnë vitamina, antioksidantë minerale etj. Ndër to veçojmë liçi (lychee), mangostinë (mangosteen), rambutan, banane, xinxife (jujube) kivi, guavë, çerimoja (cherimoya) pema e bukës (jackfruit), ananas, durian, papajë, mango, fruit i dragoit (dragon fruit) etj.

Kumkuati

Është një frut i vogël me origjinë nga Kina Jugore. Sot, ky frut rritet në disa vende të botës. Në Kinë është fryti i preferuar që nga lashtësia, dhe vlerësohet jo vetëm për vetitë që ka por, në kulturën kineze shihet edhe si fruti i bollëkut. Shijen e ka karakteristike si të gjithë citrusët aromatikë, të ëmbël dhe të athët.

Po çfarë vlerash ushqyese ka ky frut

■ 100 g i tij përmban 71 kalori. Është i pasur në fibra, minerale, vitamina dhe anti-oksidantë, të gjitha këto i bëjnë mirë shëndetit.

■Kumkuati konsumohet me gjithë lëkurë, një veçanti kjo që e ndan atë nga frutet e tjera të familjes së qitros. Pikërisht është lëkura e këtij fruti që përmban një sasi të lartë anti-oksidantësh dhe fibrash.

■Kumkuati përmban gjithashtu karoten, lutein, zea-xanthin, taninë… etj.

■Ai përmban gjithashtu vitamina A, C dhe E. Të gjitha këto vitamina ndihmojnë në eleminimin e radikaleve të lira nga trupi, duke mbrojtur nga kanceri, diabeti, infeksionet etj.

■Ashtu si dhe portokalli, kumkuati është i pasur në vitaminë C. Vitamina C është një anti-oksidant shumë i fuqishëm që shërben për shëndetin e zemrës; ka veti të shërojë plagët, ndihmon kundër sëmundjeve të ndryshme nervore, lufton artritin, diabetin etj. Për më tepër vitamina C ndihmon në thithjen e hekurit tek ushqimet duke e rregulluar atë në formën e duhur në stomak.

■Kumkuati përmban dhe një nivel të lartë të grupit të vitaminave B-kompleks si tiamina (vitamina B1), niacina (vitamina B3), folate dhe acidin pantotenik (vitamina B5). Këto vitamina ndihmojnë për metabolizmin e karbohidrateve, proteinave, dhe yndyrnave.

■Për më tepër, kumkuati përmban minerale si kalcium, bakër, kalium, hekur dhe zink. Kalciumi është elementi kryesor që kërkohet për shëndetin e kockave dhe të dhëmbëve. Bakri nevojitet për prodhimin e qelizave të kuqe të gjakut.

Kumkuti mund të ruhet në temperaturën e dhomës për 3-4 ditë dhe në frigorifer për mbi 3 javë.

Liçi (lychee)

Liçi quhet ndryshe edhe qershia aziatike, pemë shumë e preferuar në Kinë. Lëkura e liçit ka ngjyrë të kuqerremtë dhe nën të gjendet tuli transparent i cili mbështjell bërthamën.

Vetitë e liçit

■Liçi përmban 66 kalori për 100 g, përmban fibra, vitamina dhe antioksidant.

■Studimet kanë treguar se tek liçi ndodhet një substancë me veti anti-oksidante, oligonol. Oligonoli mendohet se ndihmon kundër infeksioneve. Për më tepër ndihmon në përmirësimin e qarkullimit të gjakut në organe, redukton peshën, si dhe mbron lëkurën nga rrezet e dëmshme të diellit.

■Liçi, ashtu si dhe limoni e portokalli, është një burim i shkëlqyer i vitaminës C; 100g liçi përmbajnë 71.5 mg ose 119% të nevojave ditore. Studimet kanë treguar se konsumi i frutave të pasura me vitaminë C ndihmojnë trupin e njeriut të jetë rezistent ndaj infeksioneve, si dhe kundër radikaleve të lira.

■Liçi përmban gjithashtu vitaminat B dhe mineralet si kalium dhe bakër. Kaliumi është një komponent i rëndësishëm i cili ndihmon për të kontrolluar rrahjet e zemrës dhe qarkullimin e gjakut;

Mangostina (mangosteen)--- mbretëresha e frutave

Mangostina është cilësuar si mbretëresha e frutave dhe ka veti shumë të çmuara për shëndetin. Ajo ka madhësinë e një portokalli, me lëkurë në ngjyrë vjollcë të fortë.

Shija e saj është shumë unike dhe nuk ngjason me asnjë frut tjetër. Ajo është cilësuar shpesh si "Mbretëresha e Frutave " ose "Ushqimi i Zotave " në disa ishuj të Karaibeve. Megjithëse është e vështirë ta përshkruash shijen e saj shumë njerëz e krahasojnë atë me kombinimin e shijes së luleshtrydhes me portokallin.

Kinezët janë njohur për përdorimin e mangostinës në mjekësinë e tyre prej qindra vjetësh. Origjina e saj është nga Azia juglindore.

Mangostinën sot e gjejmë në Tajlandë, Filipine, Xhamajkë, Kubë etj.

Lëkura e mangostinës mund të hiqet me dorë, pa përdorur thikën.

Në Kinë, ky frut përdoret për trajtimin dhe kurimin e dizanterisë, ekzemës, por jo vetëm kaq.....

Besohet se mangostina është e pasur në shumë vlera ushqyese, ka një nivel të lartë fenolesh. Ajo është edhe fruti që përmban përqindjen më të lartë të një lloj anti-oksidanti të quajtur xanthone.

Për më tepër, mangostina përmban shumë kalcium, hekur dhe vitaminë B1.

Studimet e kryera mbi mangostinën

Mangostina është përdorur në shumë studime kundër kancerit. Një nga studimet tregon se si mangostina mund të reduktojë bindshëm rritjen e tumorit. Një tjetër studim tregoi mbi potencialin e saj për të parandaluar kancerin e prostatës.

Rritja e qelizave të kancerit të lëkurës frenohet me anë të përdorimit të ekstraktit të mangostinës, duke dëshmuar se ky frut çudibërës mund të ketë një rol shumë madhor për luftën kundër kancerit.

Rambutan

Edhe rambutani është një frut ekzotik i Azisë Juglindore.

Ky është një frut i zakonshëm në Kinë, Malajzi, Tajlandë, Filipine dhe Vietnam.

Rambutani është një burim i shkëlqyer i beta karotenit, anti-oksidant që e gjejmë edhe tek domatet, bananet dhe në fruta e perime të tjera me ngjyrë të verdhë në portokalli. Po ashtu rambutani është i pasur në vitaminë C dhe flavonoide.

Rambutani përmban gjithashtu vitaminë A, kalcium, magnez, sodium, zink, hekur, kalium, bakër, mangan etj.

Hekuri, bakri dhe mangani tek rambutani janë përgjegjës për shumë funksione, ku më i rëndësishmi është për përmirësimin e sistemit të qarkullimit.

Rambutani është dhe një frut i mirë që ndihmon pastrimin e zorrëve dhe frenon grumbullimin e helmeve.

Fruti i Dragoit (Pitaya)

Pitaya është një frut ekzotik që gjendet në mbarë Azinë. Ky frut njihet ndryshe edhe si "fruti i dragoit". Ai njihet për vlerat e larta ushqimore, përmban shumë vitamina.

Minerale, fibra dhe antioksidantë. Po ashtu ky frut ka një përqindje të lartë vitaminash A dhe C si dhe kalciumi. Pitaya rekomandohet për personat që vuajnë nga diabeti, ul rrezikun e shfaqjes së sëmundjeve të zemrës si dhe normalizon tensionin e lartë të gjakut.

Pitaya është një burim i shkëlqyer antioksidantësh, të cilët ndihmojnë në eleminimin e radikaleve të lira. Një veti tjetër e mirë tek "fruti i dragoit" qëndron tek farat të cilat përmbajnë acide yndyrore të dobishme për shëndetin. Po ashtu pitaya është i pasur në shumë fibra, 1g fibra për 100g frut të freskët.

Kiwano

Kiwano është një frut i pjesës jugore të Afrikës dhe shija është një kombinim mes pjeprit dhe trangullit. Ky frut sot kultivohet edhe në Zelandën e re dhe Australi, po ashtu edhe në shumë vende të tjera.

Ai ka shumë veti të çmuara për shëndetin pasi përmban përqindje të lartë të vitaminës C, hekurit dhe kaliumit. Po ashtu përmban edhe fosfor, magnez, zink, kalcium e bakër. Farat e tij përmbajnë linoleic dhe acid oleic. Linoleic është acid yndyror omega, i cili vlen për shëndetin dhe ndihmon në uljen e tensionit të gjakut.

Po ashtu farat e kiwano-s përmbajnë shumë antioksidantë dhe vitaminë E. Shumë pjesë të trupit të njeriut përfitojnë nga konsumi i kiwano-s, si qelizat e kuqe të gjakut, lëkura, muskujt, nervat etj. Vitamina E ndihmon organizmin për të neutralizuar dëmet nga radikalet e lira, të cilat shkaktojnë kancer dhe sëmundje kardiovaskulare. Mendohet gjithashtu se vitamina E ndihmon në uljen e rrezikut të prekjes me sëmundjen e Parkinson-it dhe Alzhajmerit.

Disa përfitime të tjera të kiwano-s janë tek përqindja e lartë e beta-carotenit dhe vitaminës A. Beta-caroteni është shumë i vlefshëm për forcimin e sistemit imunitar. Vitamin A vlen për shëndetin e syve, po ashtu edhe për bukurinë e lëkurës.

Duriani, "Mbreti i frutave"

Duriani me origjinë nga Azia Juglindore njihet me epitetin si "mbreti i frutave", për shkak të vetive të larta ushqyese që përmban. Është i pasur në antioksidantë dhe proteina. Ka aromë të fortë, disa thonë të pakëndshme, megjithatë shije unike dhe vlera të çmuara.

Duriani lufton:

Depresionin

Ankthin

Pagjumësinë

Problemet me oreksin

Dhimbjet

Migrenën

Buliminë

Çrregullimet me humorin

Stresin

Duriani ka veti antimikrobiale, antibakteriale dhe kundër mykut

Ai po ashtu u jep shkëlqim flokëve, çtensionon muskujt dhe forcon funksionin e trurit.

Po ashtu pengon mpiksjet e gjakut, duke parandaluar atakun dhe sulmet në tru.

1. Duriani furnizon trupin me vitamina

Ai është i pasur në vitamina B, C dhe E. Ndihmon për uljen e kolesterolit. Përbërësit tek duriani kontrollojnë nivelin e sheqerit dhe kolesterolit të keq.

-Duriani gjithashtu është një pastrues i mirë i gjakut.

Ngrënia e rregullt e durianit largon toksinat nga trupi dhe gjaku. Është një nga ushqimet top për pastrimin e gjakut, po ashtu falë përmbajtjes së lartë të hekurit lufton aneminë.

Duriani përmban gjithashtu përqindje të lartë aminoacidesh të quajtura tryptophan. Ky aminoacid njihet për rolin e tij në luftën kundër pagjumësisë, ankthit dhe depresionit. Ndihmon gjithashtu në rritjen e nivelit të serotoninës, hormonit të lumturisë.

Ai gjithashtu forcon muskujt dhe përmirëson jetën seksuale, pasi është një afrozodiak shumë i fuqishëm.

Megjithëse duriani është një frut shumë i ushqyeshëm nuk duhet të konsumoni sasi të lartë.

Jackfruit (Pema e bukës)

Është një frut me origjinë nga India, Bangladeshi, Filipinet dhe Sri Lanka. Ai njihet për aromën e tij të këndshme që mund të ndihet edhe nga larg. Frut unik si në shije ashtu edhe në formë.

Ky frut përmban kalium dhe ekstrakti i tij thuhet se ndihmon në trajtimin e diarresë. Falë oksidantëve ai lufton kancerin, ndërsa rrënjët e tij përdoren për trajtimin e astmës.

Jackfruit përmban përqindje të lartë të vitaminës C, përmban gjithashtu isoflavone dhe antioksidantë.

Ky frut lufton ulcerën, po ashtu ndihmon të gjithë ata që vuajnë nga problemet me tretjen.

Konsumimi i këtij fruti ju mban gjithnjë të rinj, pasi ndihmon në ngadalësimin e degjenerimit të qelizave. Lëkura e personave që e konsumojnë atë duket gjithnjë më e re.

Ai gjithashtu trajton tensionin e lartë dhe nervozizmin. Lufton kapsllëkun dhe problemet me lëkurën.

100 gram jackfruit përmban 95 kalori.

Salak, "fruti i kujtesës"

Salaku njihet gjithashtu si fruti gjarpër për shkak të lëkurës së tij dhe e ka origjinën nga Indonezia, Brunei dhe Malajzia. Ka madhësinë dhe formën e fikut. Tuli i këtij fruti ka ngjyrë të verdhë dhe është me shije të ëmbël.

Përfitimet shëndetësore nga konsumi i salak-ut

Fruti përmban kalcium, flavonoide, saponinë dhe taninë.

Përmban protein, beta-caroten, vitaminë C, hekur, kalcium, fosfor dhe karbohidrate.

1. Ilaçi i syve

Sipas studimeve të kryera tek salaku ka rezultuar se ai është i pasur me beta-karoten, duke u bërë një ushqim i shkëlqyer për shëndetin e syve.

2. Lufton diarrenë

Nëse keni probleme me diarrenë provoni salak.

3. Ilaç për trurin

Salak njihet si frut që përmban shumë kalium dhe pektinë, të dyja këto të mira për trurin. Kjo është dhe arsyeja pse shumë e quajnë salakun "frutin e kujtesës".

4. I mirë për stomakun

Salaku përman saponinë, beta-karoten, taninë, flavonoide dhe kalcium. Të gjitha këto e klasifikojnë këtë frut në grupin e superushqimeve. Tanina ndihmon shumë për të luftuar diarrenë dhe lëvizjen e zorrëve.

5. Ju mban të rinj

Falë përmbajtjes së lartë të anti-oksidantëve si vitaminës C dhe fenoleve, salaku lufton plakjen e qelizave.