Sot, pothuajse në të gjitha dietat që qarkullojnë thuhet se personat që duan të bien nga pesha duhet të hanë vetëm perime. Kjo teori bie në kundërshtim me parimin themelor të ekuilibrit sipas Mjekësisë Tradicionale Kineze, thotë profesori Qian Hai i Universitetit të Shangait për Mjekësi Tradicionale Kineze.

Ngrënia e prodhimeve me bazë shtazore është thelbësore për ruajtjen e një ekuilibri midis yin-it (energjia e ftohtë) dhe yang-ut (energjia e ngrohtë), shton ai.

Mishi, peshku, vezët dhe pothuajse të gjitha prodhimet me bazë shtazore janë yang, ndërkohë pjesa më e madhe e frutave dhe e perimeve janë yin.

 Të heqësh dorë nga mishi…

Shumica e të rinjve po heqin dorë nga mishi dhe po ushqehen vetëm me perime për të qëndruar në formë. Disa njerëz mendojnë se do të bien më shpejt nga pesha nëse ndjekin një dietë vegjetariane, ndërkohë, ata duhet të kenë kujdes nga karbohidratet.

Dietologët kinezë theksojnë se personat të cilët duan të heqin dorë nga mishi duhet të tregohen të kujdesshëm që të marrin të gjithë ushqyesit e nevojshëm. Po ashtu një dietë vegjetariane nuk shihet e përshtatshme për gratë shtatëzëna dhe fëmijët.

Nëse jeni vegjetarianë duhet të konsumoni arra, fasule soje dhe prodhime peshku.

Vetëm ngrënia e perimeve – pa shumë yndyrë –mund të jetë një zgjidhje për ata persona që janë obezë ose për ata të cilët kanë sasi të lartë yndyrnash në gjak, thotë nutristi kinez, Yang Kefeng.

Por, kjo mënyrë ushqimi nuk është e përshtatshme për këdo (sidomos për fëmijët dhe gratë shtatëzëna) dhe të ushqyerit vetëm me perime mund të ketë pasojë në të ardhmen, shton ai.

"Është e vërtetë që prodhimet nga soja ofrojnë pothuajse të njëjtat vlera të larta proteinike si mishi," thotë Yang. "Por prapë, kërkesat ushqimore nuk përmbushen vetëm duke ngrënë perime."

Vegjetarianët duhet të konsumojnë perime me gjethe jeshile si, bok choy, brokoli dhe perime të tjera që përmbajnë hekur. Kalciumin e gjejmë tek fasulet e sojës, portokallet, spinaqi dhe farat e susamit.

Nëse ndiqni një dietë vegjetariane, pra vetëm me perime e fruta, duhet të keni kujdes pasi perimet nuk ofrojnë të gjithë sasinë e duhur të vitaminave dhe mineraleve, përfshi vitaminën B-12 dhe D. Për të marrë të vitaminat dhe mineralet më të nevojshme ju duhet të konsumoni një varietet më të gjerë ushqimesh për të përmbushur kërkesat ditore për omega-3 dhe aminoacide të tjera.

Nëse ndiqni një dietë vegjetariane, problem për ju mbeten proteinat. Proteina është një burim aminoacidesh, që ju duhet për të prodhuar qeliza të reja. Ndërkohë që ushqimet me bazë shtazore ofrojnë të gjitha 9 aminoacidet kryesore në sasinë e nevojshme, fasulet e sojës dhe produktet e saj janë perimja e vetme që ofron të gjitha aminoacidet.

Pra, për të gjithë ata që janë vegjetarianë, apo ata të cilët nuk e pëlqejnë mishin, sugjerohet të konsumojnë prodhime me bazë soje. Duke shtuar tërshërë dhe fruta arrore në dietën tuaj, apo duke konsumuar më shumë bulmet dhe vezë ju jep mundësinë të asimiloni aminoacidet e nevojshme.

Po cili mish është më i shëndetshmi ?

Shpeshherë dëgjojmë në programet e ndryshme mbi shëndetin apo dietat e dobësimit se mishi i bardhë është më i shëndetshëm se mishi i kuq.

Dietologët theksojnë se për të shmangur një numër të konsiderueshëm sëmundjesh si obeziteti, diabeti, hipertensioni etj., duhet të reduktojmë përdorimin e yndyrnave dhe të mishit të kuq

Ekspertët theksojnë se nëse preferoni mishin e kuq të paktën shmangni atë me dhjam. Ata thonë se mishi i bardhë, përfshi peshkun, frutat e detit dhe mishin e shpendëve është i shëndetshëm, pasi nuk përmban dhjamë dhe është mish më i lehtë se ai i kuqi, pra ka më pak kalori.

Janë zhvilluar disa studime nga ku ka rezultuar se mishi i kuq është përgjegjës për zhvillimin e disa lloje kanceresh si psh; kanceri i gjoksi, i stomakut, zorrës së trashë, prostatës, etj.

Konsumimi i mishit të kuq i cili është i gatuar më shumë seç duhet, mundet të rrisë riskun për kancer, për shkak të zhvillimit të disa komponenteve kancerogjenikë.

Një sasi e konsiderueshme ditore e acideve yndyrore Omega-3 ju nevojitet për të mbajtur një shëndet të mirë. Zakonisht perimet përmbajnë një sasi të ulët të këtyre acideve. Peshku, sidomos salmoni mbahet për sasinë më të lartë të omega-3, megjithatë omega-3 përmbajnë edhe arrat, farat e lirit, perimet me gjethe jeshile, fasulet e sojës dhe algat.

Vitamina B-12 është një tjetër element që nuk mund ta merrni nga perimet, pasi ajo gjendet vetëm tek ushqimet me bazë shtazore. Këtë vitaminë trupi e kërkon që qelizat e kuqe të gjakut të transportojnë oksigjenin në të gjithë trupin. Vegjetarianët duhet ose të konsumojnë ushqime që janë të mbushura me këtë vitaminë, si çerealët e mëngjesit ose të marrin një vitaminë B-12 në formë suplementi.

Për të marrë vitaminën D, vitaminë e rëndësishme për shëndetin e dhëmbëve, kockave etj, burimi kryesor është drita e diellit. Burime të tjera janë kërpudhat, qumështi, kosi, mëlçitë dhe e verdha e vezës.

Këshilla:

Përfshini në dietën tuaj ushqime nga grupe të ndryshme. Mund të kombinoni në mëngjes frutat me çerealët ose mund të bëni sanduiç me peshk ton dhe perime, por mos i hidhni majonezë. Në vend që të hani patatina më mirë konsumoni një grusht me arra ose bajame e stika çdo ditë. Kombinimi i fibrave me proteinat do t'ju largojë ndjenjën e urisë si dhe do ta furnizojë trupin me mineralet dhe vitaminat e duhura.