Fiqtë e thatë janë ndër të pakta fruta që e furnizojnë trupin njëkohësisht edhe me magnez, kalcium, omega-6, fibra vitamina etj.

Të pasur me fibra

Gjysmë gote me fiq të thatë përmban 7.3 g fibra. Fibrat në dietën tuaj ndihmojnë në uljen e rrezikut të prekjes nga diabeti dhe sëmundjet e zemrës. Sipas Institutit të Mjekësisë, gratë kanë nevojë për 25 gramë fibra në ditë, ndërsa burrat për 38 gramë.

Fiku përmban më shumë kalcium se çdo frut tjetër, 121 mg në gjysmë gote me fiq. Kalciumi është mineral esencial për shëndetin e kockës dhe redukton rrezikun e shfaqjes së osteoporozës. Të rriturit duhet të marrin nga 1,000 deri në 1,200 mg kalcium në ditë. Megjithatë nëse keni mungesë të vitaminës D dhe konsumoni shumë kalcium, ky i fundit nuk do t'ju ndihmojë pasi i duhet vitamina D. Po ashtu që kalciumi të përthithet më mirë nga kocka i duhet magnezi. Për këtë duhet të përfshini në dietën tuaj të gjitha ato ushqime që përmbajnë kalcium (kos, qumësht) magnez (bajame, prodhime deti, dhe vitaminë D (15 minuta në diell çdo ditë plotësoni nevojën ditore për vitaminë D). Duhet të keni kujdes që kalciumin ta merrni nëpërmjet ushqimeve, pasi nëse e merrni atë në formë suplementi ka të ngjarë të merrni më tepër kalcium se niveli i lejuar. Sipas një studimi të fundit janë ngritur dyshimet se më tepër kalcium në trup shkakton kancer prostate tek meshkujt.

Fiku i thatë ul tensionin e gjakut

Fiku i thatë përmban nivel të lartë të kaliumit, element ky që kontrollon rrahjet e zemrës dhe ndihmon në uljen e tensionit të lartë të gjakut. Vetëm gjysmë gote me fiq të thatë përmban 507 mg kalium. Sasia e kërkuar për kalium në ditë sipas Shoqatës Amerikane për Zemrën dieta duhet të përmbajë 4,700 mg kalium të siguruar nga ushqimi natyral. Banania gjithashtu është një burim i mirë i kaliumit.

Fiqtë e thatë përmbajnë hekur

Vetëm duke ngrënë gjysmë gote fiq të thatë mund të përmbushni nevojat ditore për hekur. Hekuri është një element thelbësor që nevojitet për transportimin e oksigjenit në gjak. Pa sasinë e mjaftueshme të hekurit në dietën tuaj, qelizat nuk furnizohen sa duhet me oksigjen, duke shkaktuar lodhje dhe ndjenjë dobësie, po ashtu rritet edhe mundësia për infeksion. Burrat dhe gratë mbi 51 vjeç duhet të marrin 8 mg hekur në ditë, ndërsa gratë nga mosha 19 deri në 50 vjeç duhet të marrin 18 mg në ditë.

Parandaloni goditjet cerebrale me kalium

Kaliumi ka një rol kyç për shëndetin tonë. Ai është pjesë e çdo qelize në trup dhe jeta pa të do të ishte e pamundur.

Kaliumi nuk duhet të nënvlerësohet pasi ai ndihmon në funksionimin normal të trurit, nervave, zemrës dhe muskujve.

Është tejet e rëndësishme të merrni sasinë e duhur të kaliumit çdo ditë për t'u ndjerë mirë si dhe për të parandaluar sëmundjet kronike.

Kaliumi mbron zemrën dhe trurin

"Kaliumi në dietë ul tensionin e gjakut. Tensioni i lartë i gjakut është një rrezik madhor për sulme në tru dhe sëmundje kardiovaskulare," thotë Lawrence Appel nga Institucioni Mjekësor "Johns Hopkins".

Appel, që ka studiuar efektet e dietës për uljen e tensionit të gjakut, thotë për "WebMD" se kaliumi ul tensionin e gjakut duke kontribuar në fleksibilitetin e arterieve, si dhe duke ndihmuar trupin të nxjerrë tepricat e sodiumit. Ky i fundit nxit mbajtjen e lëngjeve në trup, që mund të rezultojë në rritjen e tensionit të gjakut.

Kaliumi ndihmon në shëndetin e kockave, po ashtu redukton rrezikun e formimit të gurëve në veshka.

Kaliumin e gjejmë në sasi të konsiderueshme tek banania, fiqtë e thatë, qumështi, peshku, zarzavatet me gjethe jeshile, kosi etj.

Kaliumi është jo vetëm thelbësor për zemrën dhe flukset nervore, por luan edhe një rol të rëndësishëm në kontraksionet e muskujve dhe të zemrës. Nëse keni probleme me ngërçet duhet të konsumoni më shumë ushqime që përmbajnë kalium.

Nevoja ditore për kalium është 3500-4700 mg në ditë, por problemi është si mund ta sigurojmë këtë sasi kur gjatë një dite nuk duhet të marrim më shumë se 2 mijë kalori. Një zgjidhje e shpejtë mund të ishte marrja e një suplementi, por kjo nuk këshillohet pasi suplementët janë të prodhuara në laborator dhe janë thjesht sintetike. Trupi i njeriut njeh dhe përthith më mirë vitaminat dhe mineralet që vijnë nga ushqimet natyrale.

Mungesa e kaliumit në ushqimin ditor mund të prishë ekuilibrin acid/bazik në trup, gjë që do të çonte në dhimbje kockash, formimin e gurëve në veshka dhe rritje e tensionit të gjakut; mungesa e kaliumit çon në kontraktim muskujsh, dobësi, konfuzion dhe humbje oreksi. Nëse niveli i kaliumit ka rënie të menjëhershme atëherë mund të shkaktojë probleme me zemrën dhe në disa raste mund të jetë fatale.

Megjithëse marrja mbi normën e lejuar e kaliumit gjatë një dite është pothuajse e pamundur, teprica e tij mund të çojë në arrest kardiak dhe deri në vdekje; ata të cilët kanë probleme me veshkat ose probleme të tjera dhe marrin suplement kaliumi janë ata të cilët rrezikohen më shumë nga niveli i lartë i gjakut. Për këtë përpiquni t'i përmbushni kërkesat ditore për kalium me anë të ushqimit të përditshëm..

Ja disa ushqime që përmbajnë kalium:

•Frutat si papaja, bananet, futat e thata (rrushi, kumbulla hidet etj),

•Perimet si spinaqi, patatja e ëmbël, kërpudhat, lakra kineze bok choy, domatet etj.

•Fasulet dhe thjerrëzat përmbajnë nivel të konsiderueshëm kaliumi

•Kosi dhe qumështi pa yndyrë

•Peshku, salmoni, sardelet etj.

1 filxhan me portokall dhe qitro përmban 500mg kalium.

1 banane ka 450mg kalium

1 filxhan me fasule lima përmban 1000mg kalium

Patatet e pjekura afro 900mg

Nëse konsumoni të gjitha ushqimet që kanë kalium dhe përsëri keni mungesë kaliumi atëherë jeni duke përdorur shumë kripë.

Kripa e tepërt prish ekuilibrin midis natriumit e kaliumit dhe për pasojë shfaqet hipertensioni, shqetësime kardiake apo cerebrale, humbje të kalciumit , gurë në veshka apo osteoporozë.

Përveç frutave dhe perimeve edhe çokpllata është një burim i mirë kaliumi.