Pas kthimit nga Uashingtoni të delegacionit shqiptar, mësohet se është negociuar me FMN-në, Bankën Botërore, por edhe donatorë të tjerë si BERZH-i për të siguruar një borxh të ri, që do të përdoret kryesisht për të shlyer faturën e detyrimeve ndaj sipërmarrjes private.
Burime zyrtare në Ministrinë e Financave bëjnë të ditur për News 24 se shuma e borxhit që do të merret nga donatorët ende nuk është përcaktuar, por sigurimi i kësaj huaje do të jetë me kushte për qeverinë shqiptare. Këto kushte kanë të bëjnë kryesisht me reformën në sistemin fiskal, si dhe kufizimin e shpenzimeve buxhetore.
Marrja e një borxhi të ri nga donatorët do të rrisë nivelin e borxhit publik te vendit, por ajo që mbetet për t'u parë është sesa do të jetë shuma e këtij detyrimi të ri dhe interesi me të cilin ai do të sigurohet.
Pak kohë më parë, në konferencën e përbashkët për shtyp të shefit të misionit të FMN-së Naddem Ilahi dhe ministrit të financave, Shkelqim Cani, ky i fundit deklaroi se borxhi i ri që do të kërkohet mund të jetë edhe 2 miliardë, por edhe 40 miliardë lekë, por ajo që garantoi kryefinanciari Cani është gjetja e parave me interesat më të ulëta. (News24)