Të enjten u zhvillua në Romë takimi i "Miqve të Sirisë", në të cilin morën pjesë përfaqësuesit e vendeve europiane dhe të Lindjes së Mesme që mbështesin opozitën siriane. Ishin të pranishëm gjithashtu edhe kryetar i Koalicionit Kombëtar për Forcat e Opozitës dhe të Revolucionit Sirian Mouaz al-Khatib, si dhe sekretari amerikan i Shtetit Xhon Keri, që ndodhej për një vizitë në Itali.

Në deklaratën e publikuar pas takimit, palët e ndryshme u shprehën se do të bashkërendojnë qëndrimet, duke thelluar bashkëpunimin për të garantuar rikthimin e pushtetit në duart e popullit sirian. Në deklaratë kërkohet gjithashtu që presidenti Bashar Al-Assad të japë dorëheqjen e menjëhershem nga posti për ta çuar vendin në procesin e tranzicionit politik demokratik.

Gjithashtu, pas takimit, kryediplomati amerikan Xhon Keri deklaroi se qeveria e ShBA-së do t'i japë opozitës siriane ndihmë në ushqime, pajisje mjekësore etj., me një vlerë prej 60 milionë dollarësh amerikanë.