Partia Komuniste e Kinës, partia në pushtet në Kinë, publikoi të enjten një komunikatë, në të cilën bëhet e ditur se në mbledhjen plenare të Komitetit Qendror të Partisë Komuniste të Kinës u miratua projekti i shndërrimit të funksioneve dhe i reformës institucionale të Këshillit të Shtetit, si edhe iu sugjerua Këshillit të Shtetit t'ia paraqitë këtë projekt për shqyrtim sesionit të parë të legjislaturës së 12-të të Asamblesë Kombëtare Popullore të Kinës që do të mbahet më 5 mars. Në komunikatë thuhet se duhet të ngulet këmbë në konceptet se i pari është njeriu, të qeverisjes për popullin dhe të administrimit në shërbim e të shërbimit në administrim. Specialisti përkatës i tha gazetarit të radios sonë se epiqendra e reformës së tanishme është shndërrimi i funksioneve të qeverisë, rregullimi i marrëdhënieve të brendshme të institucioneve dhe i mekanizmit të funksionimit të tyre, me qëllim që të rregullohen kompentencat dhe të rikthehet vlera e shërbimeve publike të qeverisë.
Profesori i departamentit të administrimit publik në Shkollën Kombëtare të Administrimit të Kinës Zhu Fei është i mendimit se reforma që do të zbatohet së shpejti, përmban disa rregullime të vogla mbi bazën e reformës së vitit 2008. Synimi i saj është sigurimi dhe përmirësimi i jetesës së popullit, forcimi i administrimit shoqëror dhe zhvillimi i organeve të shërbimeve publike, si edhe pakësimi i dukurive të tilla si vakuumi ose mbivendosja e kompetencave, si rrjedhojë e shtimit të kompetencave ose funksioneve të qeverisë.
Në reformën e çdo here ka bashkim ose integrim departamentesh. Në reformën e vitit 2008, gjithsej 15 institucione u ristrukturuan dhe u formuan Ministria e Industrisë dhe të Informacionit, Ministria e Transportit dhe e Komunikacionit, Ministria e Sigurimeve Shoqërore dhe e Burimeve Njerëzore, Ministria e Mbrojtjes së Mjedisit dhe Ministria e Strehimit dhe e Zhvillimit të Qytetit dhe të Fshatit. Gjatë reformës së kësaj here fokusi është në integrimin e degës së sigurisë ushqimore si një institucion administrativ në shkallë ministrie.
Sipas ekspertëve, institucionet qeverisëse në shoqërinë moderne kanë nevojë për profesionalizëm dhe çelësi për këtë është marrja nga secili e përgjegjësive që i takojnë. (Vera/Artani)
