Kina miraton vendimin për ligjet e sigurisë kombëtare në Hong-Kong

Organi më i lartë ligjvënës i Kinës ka miratuar një vendim mbi ligjet e sigurisë kombëtare në Hong-Kong.

Kjo do të bëjë të mundur që organet e sigurisë të qeverisë qendrore të vendosen në Hong-Kong kur të jetë e nevojshme.

Asambleja Kombëtare Popullore e miratoi projektligjin me një mbështetje gati unanime nga ligjvënësit në fund të sesionit të saj vjetor.

Sipas AKP-së, vendimi është marrë për të mbrojtur sigurinë kombëtare dhe përparimin afatgjatë të Hong-Kongut.

Kryetari i Komitetit të Përhershëm të Asamblesë Kombëtare Popullore Li Zhanshu thotë se vendimi u shërben interesave themelorë të të gjithë kinezëve, duke përfshirë bashkatdhetarët e Hong-Kongut.

AKP-ja do t'ia besojë komitetit të vet të përhershëm zbatimin e ligjeve të sigurisë kombëtare në Hong-Kong.

Duke folur për shtypin pas sesionit legjislativ, kryeministri kinez Li Keqiang tha se "Një vend, dy sisteme" është politika themelore shtetërore e Kinës dhe se vendimi ka si qëllim zbatimin e qëndrueshëm të kësaj politike.

Kryeekzekutivja e Hong-Kongut Carrie Lam e ka mirëpritur këtë veprim dhe ka thënë se qeveria e Hong-Kongut do të bashkëpunojë plotësisht me Komitetin e Përhershëm të AKP-së për të plotësuar legjislacionin sa më shpejt të jetë e mundur.

Lam mori pjesë në një fushatë publike në Hong-Kong për të mbështetur legjislacionin e sigurisë kombëtare.

Në më pak se një javë, gati 1.9 milion banorë të Hong-Kongut kanë nënshkruar një peticion që mbështet legjislacionin.

Masa ligjore pasoi trazirat e zgjatura shoqërore dhe përshkallëzimin e dhunës në rrugët e Hong-Kongut, më të mëdhatë që nga kthimi i tij në vitin 1997.