Shpejtohet rimëkëmbja e ekonomisë kineze

Në prag të dy sesioneve të Kinës për vitin 2020, mënyrat për bashkërendimin e parandalimit e kontrollit të epidemisë dhe zhvillimi ekonomiko-shoqëror i Kinës ka tërhequr vëmendjen e madhe të bashkësisë ndërkombëtare. Të dhënat përkatëse tregojnë se epidemia e COVID-19 nuk ka ndryshuar prirjen e zhvillimit të mirë të ekonomisë kineze, Kina ka besim dhe kushte për të mposhtur vështirësitë duke realizuar sipas afatit objektivat e zhvillimit ekonomik e shoqëror.

Sipas treguesve ekonomikë të publikuar në dy muajt e fundit, ekonomia kineze po shpejton rimëkëmbjen. Në prill, vëllimi i prodhimit industrial kinez u shtua 3.9% në krahasim me të njëjtën periudhë të vitit të kaluar, eksporti u shtua 8.2% duke tejkaluar shumë parashikimin.

Fabrikat kineze kanë rifilluar prodhimin, jeta e kinezëve është normalizuar gradualisht. Gjatë pushimeve të "1 majit", krahinat e ndryshme kineze pritën 115 milionë turistë vendas. Nga ana e faktorëve të prodhimit, baza dhe aftësia mbështetëse e sektorëve kinezë, kapitali njerëzor etj. mbajnë ende epërsinë, plus sistemin e përsosur të logjistikës e të transportit, mund të mbështetet rritja afatgjatë e ekonomisë kineze. Njëkohësisht Kina po thellon vazhdimisht reformën dhe hapjen me botën e jashtme dhe nxit risi për të gjallëruar potencialin e rritjes ekonomike.

Prandaj bota vazhdon të ketë besim te tregu kinez. Sipas një raporti të Ministrisë së Industrisë e të Teknologjisë së Informacionit të Kinës, rreth 40% e ndërmarrjeve me investimet e huaja në Kinë u shprehën se do të shtojnë investimet.

Kina është vendi i parë në botë që përballoi epideminë COVID-19 dhe e para që rifilloi ekonominë. Rimëkëmbja e ekonomisë kineze mund të japë kontribut për rimëkëmbjen e ekonomisë botërore. Profesori i Universitetit të Tetë të Parisit Pierre Picquart është i mendimit se hapja e dy sesioneve shënon rimëkëmbjen e ekonomisë kineze. Edhe profesori i Degës së Financës pranë Universitetit Durham të Britanisë Guo Jie u shpreh se vendimet e bëra në dy sesionet e Kinës do të përcaktojnë drejtimin e zhvillimit të ekonomisë kineze duke ushtruar ndikim mbi strukturën e ekonomisë botërore. (Fani)