Kinë, rinis plotësisht shërbimi i transportit publik në rajonet me rrezik të ulët të epidemisë

Provincat dhe qytetet kineze me rrezik të ulët të epidemisë së koronavirusit të tipit të ri do të rifillojnë plotësisht shërbimet e transportit publik të pezulluara më parë në mes të përpjekjeve të kontrollit të epidemisë, tha të premten një zyrtar i transportit.

Shërbimet e transportit publik, përfshi autobusët, metrotë, trenat dhe taksitë do të rinisin punën plotësisht në rajone me një rrezik të ulët epidemie, tha zyrtari në Ministrinë e Transportit Xu Chengguang në një konferencë për shtyp në Pekin.

Prej së enjtes, 26 provinca kanë rifilluar transportin rrugor ndër-provincial dhe 30 provinca kanë rifilluar transportin rrugor brenda krahinës, tha Xu.

Shërbimi i transportit publik tokësor në 40 qytete nuk është ndërprerë, ndërsa 78 qytete në nivel prefekture dhe 90 qytete në nivel qarku kanë rifilluar operimin e transportit publik tokësor.

Nga 41 qytete që kanë hapur tranzitin hekurudhor urban, 33 kanë pasur linjat e tyre të transportit hekurudhor në funksionim normal, ndërkohë po punojnë për rifillimin e pjesës tjetër.

Në zonat me një rrezikshmëri të lartë epidemie, duhet të bëhen përpjekje për të përmbushur nevojat e udhëtimit për punonjësit e mjekësisë, të shërbimeve publike etj., para rifillimit të plotë të transportit publik, tha Xu. (Albana)