Kinë, rritet prodhimi i maskave mbrojtëse

Në përgjigje të mungesës së maskave, zv.drejtori i Departamentit të Zhvillimit Social pranë Komisionit Kombëtar të Zhvillimit dhe Reformës Hao Fuqing, tha në një konferencë për shtyp se po rritet prodhimi i maskave mbrojtëse. Në të njëjtën kohë, materialet e dhuruara nga jashtë do të dërgohen gjithashtu direkt në aeroportin Tianhe të qytetit Wuhan me aeroplan të posaçëm.

Hao Fuqing tha në konferencën për shtyp se për të zgjidhur problemin e mungesës së maskave, lokalitetet po bëjnë çdo përpjekje për të rritur prodhimin dhe kapacitetin dhe kanë bërë përparim të rëndësishëm. Prej 3 shkurtit, prodhimi i maskave në 22 provincat kryesore në mbarë vendin ka arritur në 14 milionë e 806 mijë. Ndër to, prodhimi i maskave N95 ka arritur në 116 mijë.

Që nga shpërthimi i epidemisë, shumë vende, organizata ndërkombëtare dhe agjenci të huaja i kanë dhuruar Kinës materiale ndihme. Komisioni Kombëtar i Zhvillimit dhe Reformës ka koordinuar marrjen në konsideratë të furnizimit dhe kërkesës së maskave dhe ka ofruar ndihmë aktive në transport dhe në aspekte të tjera, për të siguruar që materialet kryesore të luajnë rolin e tyre në kohën e duhur.

Hao Fuqing tha: "Në lidhje me materialet kryesore si maskat mjekësore N95 dhe veshjet mbrojtëse të marra nga organizatat e bamirësisë, palët përkatëse kanë bërë gjithçka për të ndihmuar në koordinimin dhe zgjidhjen e vështirësive në transport. Pas transferimit të materialeve kryesore në provincën Hubei, ato do të shpërndahen sipas dëshirës së donatorëve. Për materialet e dhuruara nga qeveritë e huaja, organizatat ndërkombëtare dhe institucionet e huaja, ato do të dorëzohen drejtpërdrejt në aeroportin Tianhe të Wuhanit me aeroplanët e posaçëm. Për materialet në sasi të vogla që mbërrijnë në Pekin dhe qytete të tjera, ato do të transferohen në Wuhan brenda 48 orëve."

Të dhënat nga Administrata e Përgjithshme e Doganave tregojnë se që nga 24 janari, janë importuar gjithsej 87 milionë e 764 mijë materiale të dhuruara, me vlerën prej 286 milionë juanësh, kryesisht afro 71.8 milionë maska, mbi 1.53 milionë veshje mbrojtëse dhe 337 mijë palë syze mbrojtëse. Për ilaçet e importuara dhe pajisjet medicinale të përdorura posaçërisht për parandalimin dhe trajtimin e epidemisë, që importohen përmes metodave të ndryshme doganat kineze garantojnë që mos ketë asnjë vonesë për zhdoganimin. (Zhan Dian/Albana)