Buxheti 2020 për kulturën, rritje me 11,7%

Në Komisionin për Edukimin dhe Mjetet e Informimit Publik u diskutua dje mbi buxhetin e vitit 2020 për kulturën, buxhet ky që shënoi një rritje prej 11,7%, në krahasim me vitin që po lëmë pas.

E pranishme në këtë komision për buxhetin e 2020-s ishte ministrja e Kulturës Elva Margariti e cila shprehet se, "e kënaqur që buxheti për kulturën shënon një rritje prej 11,7%, në krahasim me vitin që po lëmë pas. Ngjarje të mëdha na presin përpara, në fushën e trashëgimisë kulturore dhe të artit".

Në prezantimin e saj ministrja Margariti shtoi se, "relacioni i përgatitur për buxhetin e vitit 2020 bazohet në politikat e qeverisë shqiptare dhe ministria a Kulturës duke hartuar programin buxhetor afatmesëm 2020-2022 është fokusuar në politikat e saj për zhvillimin e artit, kulturës, trashëgimisë kulturore dhe muzetë".

"Ky program është vlerësuar edhe në bazë të rishikimit dhe rivlerësimit të kufijve në tri programe buxhetore, në shpërndarjen e fondeve dhe ruajtjen e ekuilibrave mbështetur në tri shtylla: planifikim, menaxhim dhe administrim trashëgimi kulturore dhe muze, art dhe kulturë. Këto do të reflektohen edhe në buxhetin e vitit 2020", përfundoi ministrja Margariti.(ATSH)